ފުޓުބޯޅަ ކެރިއަރުގެ ކުރިމަގާ މެދު ގޮތެއް ނިންމާނީ ކުރިއަށް އޮތް ޔޫރޯއަށްފަހު ކަމަށް މެންޗެސްޓާ ޔުނައިޓެޑަށް ކުޅެމުން އަންނަ ޕޯޗުގަލްގެ ބްރޫނޯ ފާނަންޑޭޒް ހާމަކޮށްފިއެވެ.
ފާނަންޑޭޒް މިހެން ބުނެފައިވަނީ, މި ސީޒަނުގައި ޔުނައިޓެޑުގެ ފަރާތުން އެހާ އެދެވޭ ފަދަ ކުޅުމެއް ފެނިގެންގޮސްފައި ނުވާތީ, އެތައް ބަޔަކު ފާނަންޑޭޒް އެ ކްލަބުގައި މަޑުކުރާނެ ކަމާ މެދު ސުވާލު އުފައްދަމުން އަންނަ ދަނޑިވަޅެއްގައެވެ.
ޕޯޗުގަލްގެ މީޑިއާއަކަށް ދިން އިންޓަވިއުއެއްގައި ވާހަކަދައްކަމުން ފާނަންޑޭޒް ހާމަކުރި ގޮތުގައި, ދެން އަންނަ ސީޒަނުގައި އޭނާ ޔުނައިޓެޑުގައި މަޑު ކުރާނެ ކަމާ މެދު އެއްޗެއް ބުނެވޭނީ ކުރިއަށް އޮތް ޔޫރޯ ނިމުމުންނެވެ.
"އެހެން ކްލަބަކަށް ކުޅުމުގެ ވިސްނުމެއް މި ވަގުތު އަހަރެން ނުގެންގުޅެން. އެކަމަކު މި ކަހަލަ ކަންކަމަކީ ހަމައެކަނި އަހަރެންގެ ބާރުގައި އޮންނަ ކަންކަމެއް ނޫން. އަހަރެން ޔުނައިޓެޑުގައި މަޑު ކުރާނެ ކަމާ މެދު ވިސްނާނީ ކުރިއަށް އޮތް ޔޫރޯ ނިންމާލުމަށްފަހު" ޕޯޗުގަލްގެ ޑޭޒްން މީޑިއާއަށް ދިން އިންޓަވިއުގައި ވާހަކަދައްކަމުން ފާނަންޑޭޒް ބުންޏެވެ.
2020 ވަނަ އަހަރުގެ ޖަނަވަރީ މަހު ސްޕޯޓިންގް އިން ޔުނައިޓެޑާ ގުޅުނު 29 އަހަރުގެ ފާނަންޑޭޒް ވަނީ ޔުނައިޓެޑަށް 232 މެޗު ކުޅެދީ 79 ލަނޑު ކާމިޔާބު ކޮށްފައެވެ. އޭގެ އިތުރުން ފާނަންޑޭޒް ވަނީ 2023 ވަނަ އަހަރު ޔުނައިޓެޑަށް ކަރަބައޯ ކަޕު ކާމިޔާބު ކޮށްދިން ޓީމުގައި މުހިއްމު ދައުރެއް އަދާ ކޮށްފައެވެ.
