އޮސްޓްރިއާގެ ގައުމީ ޓީމުގެ ކޯޗުކަމުގެ މަގާމުގައި މަޑުކުރަން ރަލްފް ރަގްނިކް ނިންމައިފިއެވެ.
ރަގްނިކް މިހެން ނިންމާފައިވަނީ, އޭނާ ގެނައުމަށް ބަޔާނުން މަސައްކަތް ކުރަމުން އަންނަ ދަނޑިވަޅެއްގައެވެ.
އޮސްޓްރިއާގެ ގައުމީ ޓީމުގައި މަޑުކުރަން ނިންމި ނިންމުމާ ބެހޭ ގޮތުން ވާހަކަދައްކަމުން ރަގްނިކް ބުނިގޮތުގައި, އޭނާގެ ނިންމުމަކީ ބަޔާނަށް ގެއްލުމެއް ދިނުމުގެ މަގްސަދުގައި ނިންމި ނިންމުމެއް ނޫން ކަމަށެވެ.
"އަހަރެން އޮސްޓްރިއާގެ ކޯޗު ކަމުގެ މަގާމުގައި ހުންނަން ގަސްދުކުރީ އެ ޓީމަށް ކާމިޔާބީ ހާސިލުކޮށްދިނުމަށް ޓަކައި. އެއްވެސް ހާލަތެއްގައި މި ނިންމުމަކީ ބަޔާނަށް ގެއްލުމެއް ދިނުމުގެ ގޮތުން ނިންމި ނިންމުމެއް ނޫން" އޮސްޓްރިއާގެ ގައުމީ ޓީމުގެ ކޯޗު ކަމުގައި މަޑު ކުރަން ނިންމި ނިންމުމާ ބެހޭ ގޮތުން ވާހަކަދައްކަމުން ރަގްނިކް ބުންޏެވެ.
2022 ވަނަ އަހަރު އޮސްޓްރިއާގެ ގައުމީ ޓީމާ ހަވާލުވި ރަގްނިކް ވަނީ އެ ޓީމު ކުރިއަށް އޮތް ޔޫރޯއަށް ކޮލިފައި ކޮށްދީފައެވެ. ރަގްނިކްގެ އިރުޝާދުގެ ދަށުން ކުޅެމުން އަންނަ އޮސްޓްރިއާ ޔޫރޯއަށް ވާސިލުވީ, ޔޫރޯ ކޮލިފައިއާސްގައި އެ ޓީމު ކުޅުނު އަށް މެޗުގެ ތެރެއިން ހަ މެޗު ކާމިޔާބުކޮށް, ގްރޫޕުގެ ދެވަނައިގައެވެ.
ރަގްނިކް ގެނައުމަށް ނާކާމިޔާބު ވުމާއެކު ބަޔާނަށް ވަނީ, ދެން އަންނަ ސީޒަނުގައި އެ ކްލަބަށް ކޯޗުކަން ކޮށްދޭނެ ފަރާތެއް ހޯދުމަށް އިތުރު މަސައްކަތްތަކެއް ކުރަން ޖެހިފައެވެ. މި ސީޒަން ނިމުމުން ބަޔާން ދޫކޮށްލާނެ ކަމަށް މިހާރު އެ ކްލަބަށް ކޯޗުކަން ކޮށްދެމުން އަންނަ ތޯމަސް ޓޫޗެލް އިއުލާނު ކުރި ފަހުން އެތައް ދުވަހެއް ފާއިތުވެގެންދިޔަ ކަމުގައިވިއަސް, ބަޔާނަށް ވަނީ އޭނާގެ ބަދަލުގައި ދެން އަންނަ ސީޒަނުގައި ކްލަބުގެ ކޯޗުކަމުގެ ދައުރު އަދާ ކުރާނެ ފަރާތެއް ކަށަވަރު ކުރެވޭ ގޮތް ނުވެފައެވެ.
