މި ސީޒަން ނިމުމުން ޑޯޓްމަންޑް ދޫކޮށްލަން އެ ކްލަބުގެ ތަޖުރިބާކާރު މިޑްފީލްޑަރު މާކޯ ރިއުސް ނިންމައިފިއެވެ.
2023-2024 ވަނަ ސީޒަނުގެ ނިޔަލަށް ހަމަވާ, ޑޯޓްމަންޑްއާ އެކު ހަދާފައިވާ ކޮންޓްރެކްޓް އާ ނުކޮށް, އެ ކްލަބު ދޫކޮށްލަން ނިންމި ނިންމުން ރިއުސް އިއުލާނު ކުރީ އިއްޔެގެ ވަގުތެއްގައި ސޯޝަލް މީޑިއާއަށް އާއްމު ކުރި ވީޑިއޯއެއްގައެވެ.
ސީޒަން ނިމުމުން ޑޯޓްމަންޑް ދޫކޮށްލާނެ ކަން އިއުލާނު ކުރި ވީޑިއޯގައި ވާހަކަދައްކަމުން ރިއުސް ވަނީ, ޑޯޓްމަންޑުގައި އޭނާ ހޭދަކުރި 12 އަހަރުގައި އޭނާއަށް ހިތްވަރު ދިން ހުރިހާ ސަޕޯޓަރުންނަށް ޝުކުރު އަދާކޮށްފައެވެ.
"އަހަރެން މި ކްލަބުގައި ހޭދަކުރީ ވަރަށް އުފާވެރި އަހަރުތަކެއް. ހަޔާތުގެ ދެބައިކުޅަ އެއްބައި މި ކްލަބުގައި ހޭދަކުރި އިރު އޭގެން ކޮންމެ ދުވަހެއް ވެސް އަހަރެން ހޭދަކުރީ ނުހަނު އުފަލުގަ. އުނދަގޫ ވަގުތުތަކާ ދިމާވި ކަމުގައިވިއަސް އަހަންނަށް ހިތްވަރުދީ ކުރިއަށް ދިއުމަށް އެހީތެރިވި ހުރިހާ ސަޕޯޓަރުންނަށް އަހަރެން ވަރަށް ބޮޑަށް ޝުކުރުވެރިވަން" ޑޯޓްމަންޑް ދޫކޮށްލާނެ ކަން އިއުލާނު ކުރި ވީޑިއޯގައި ރިއުސް ބުންޏެވެ.
ރިއުސް ވަނީ ވަރަށް ޅަ އުމުރަކުން ފެށިގެން ޑޯޓްމަންޑަށް ކުޅެދީފައެވެ. 1995 ވަނަ އަހަރުން 2005 ވަނަ އަހަރުގެ ނިޔަލަށް އޭނާ ވަނީ ޑޯޓްމަންޑުގެ ޔޫތު އެކަޑަމީގައި ކުޅެފައެވެ. 2005 ވަނަ އަހަރު ޑޯޓްމަންޑް ދޫކޮށްލުމަށްފަހު ދެވަނަ ފަހަރަށް ރިއުސް ޑޯޓްމަންޑާ ގުޅުނީ 2012 ވަނަ އަހަރުގައެވެ.
ޑޯޓްމަންޑަށް ކުޅެދިން 12 އަހަރު ތެރޭގައި ރިއުސް ވަނީ އެ ކްލަބަށް 424 މެޗު ކުޅެދީ 168 ލަނޑު ކާމިޔާބު ކޮށްދީފައެވެ. އޭގެ އިތުރުން އޭނާ ވަނީ 2018 އަހަރުން ފެށިގެން 2023 ވަނަ އަހަރުގެ ނިޔަލަށް ޑޯޓްމަންޑަށް ކެޕްޓަން ކަން ވެސް ކޮށްދީފައެވެ. ރިއުސް ވަނީ ޑޯޓްމަންޑަށް ދެ ޑީއެފްބީ ޕޮކަލްގެ އިތުރުން ދެ ޑީއެފްއެލް ސުޕާ ކަޕް ކާމިޔާބު ކޮށްދީފައެވެ.
