މޭސަން ގްރީންވުޑަށް ފުރުސަތެއް ދިނުމުގެ ވިސްނުމެއް މެންޗެސްޓާ ޔުނައިޓުގެ ނެތް ކަމަށް ގެޓާފޭގެ ރައީސް އެންޖެލް ޓޯރޭސް ހާމަކޮށްފިއެވެ.
މި ސީޒަނަށް ލޯނެއްގެ މަތިން ގެޓާފޭއަށް ކުޅެމުން އަންނަ ގްރީންވުޑް އެންމެ ފަހުން ޔުނައިޓެޑަށް ކުޅެދިނީ 2022 ވަނަ އަހަރުގެ ޖަނަވަރީ މަހުގައެވެ. ގްރީންވުޑް އޭނާގެ ލޯބިވެރިޔާއަށް އަނިޔާކުރި ކަމުގެ ތުހުމަތުގައި ހައްޔަރުކުރި ފަހުން އޭނާ ޔުނައިޓެޑަށް އެއްވެސް މެޗެއް ކުޅެދީފައެއް ނުވެއެވެ. އެ މައްސަލަ ޕްރޮސެކިއުޓަރުން މިހާރު ނިންމާލަފައިވާ ކަމުގައިވިއަސް ގްރީންވުޑް އަނބުރާ ޓީމަށް ގެނައުމަށް ޔުނައިޓެޑުން ވަނީ ދެކޮޅު ހަދާފައެވެ.
ޔުނައިޓެޑުން ގްރީންވުޑް ބޭރުކޮށްލި ކަމުގައިވިއަސް ގެޓާފޭގެ ރައީސް ޓޯރޭޒް ވަނީ ލޯނެއްގެ މަތިން އޭނާ ސޮއިކޮށް, އޭނާއަށް ފުޓުބޯޅައިގެ ތެރެއަށް ވަނުމުގެ ފުރުސަތު ފަހިކޮށްދީފައެވެ. ޓޯރޭޒް ހާމަކުރި ގޮތުގައި ގްރީންވުޑް ގެޓާފޭގައި ހުރީ ވަރަށް ހިތްހަމަޖެހިގެން ކަމަށާއި އޭނާ ގެޓާފޭގައި މަޑު ކުރަން ބޭނުންވާ ކަމަށެވެ.
"ގެޓާފޭގައި މަޑުކުރުމަކީ ހަމައެކަނި ގްރީންވުޑުގެ އަތްމަތީގައި އޮތް ނިންމުމަކަށްވާނަމަ އޭނާ މި ކްލަބުގައި މަޑުކުރާނެ ކަން އަހަންނަށް ވަރަށް ޔަގީން. ޔުނައިޓެޑުން ބޭނުންވަނީ ރަނގަޅު އޮފާ އެއް އައިސްފިނަމަ ގްރީންވުޑް ވިއްކާލަން. ޔުނައިޓެޑުން ބޭނުމެއް ނުވޭ އޭނާ އެ ކްލަބަށް ގެންދާކަށް" ގްރީންވުޑްގެ ކުރިމަގާ ބެހޭ ގޮތުން ވާހަކަދައްކަމުން ޓޯރޭޒް ބުންޏެވެ.
ގްރީންވުޑް ވަނީ މި ސީޒަނުގައި ގެޓާފޭއަށް 32 މެޗު ކުޅެދީ 10 ލަނޑު ކާމިޔާބު ކޮށްދީފައެވެ. ލަލީގާގައި މޮޅު ކުޅެއް ދައްކަމުން އަންނަ ގްރީންވުޑް ގަތުމަށް އެޓްލެޓިކޯ މެޑްރިޑާއި ބާސެލޯނާ ވަނީ ޝައުގުވެރިކަށް ހާމަކޮށްފައެވެ.
