ޕެރިސްގައި މި އަހަރު އޮންނަ އޮލިމްޕިކްސްއަށް ހާއްސަ އޮލިމްޕިކް "ހުޅުކޮޅު" ފްރާންސްގެ މާސޭއަށް އަރުވައިފިއެވެ.
ގްރީސްއިން މާސޭއަށް އެރުވި އޮލިމްޕިކް "ހުޅުކޮޅު" ގެނައީ 128 އަހަރު ފުރިފައިވާ ބެލެމް ނަމަކަށް ކިޔުނު ރިޔާ ދޯންޏެއްގައެވެ. ދޯނި މާސޭއަށް ލެފުމާއެކު "ހުޅުކޮޅު" ދޯނިން ބޭލުވީ 2012 ވަނަ އަހަރުގެ އޮލިމްޕިކްގައި ފިރިހެން ޑިވިޝަނުގެ 50 މީޓަރު ފެތުމުގެ ރޭހުގައި އެއްވަނަ ހާސިލުކުރި ފްލޮރެންޓް މަނައުޑޫއެވެ.
ހުޅުކޮޅު މާސޭއަށް އެރުވުމާއެކު އޭގައި އަލިފާން ރޯކުރީ މާސޭއަށް އުފަން ފްރާންސްގެ ރެޕާއެއް ކަމުގައިވާ ޖުލްއެވެ.
އޮލިމްޕިކް ހުޅުކޮޅަކީ ކޮންމެ އޮލިމްޕިކްސް އިވެންޓަކަށް ރޯކުރާ އެއްޗަކަށް ވާތީ، މިފަހަރު މިމަންޒަރު ބަލާލުމަށް ލައްކައަކަށްވުރެ ގިނަ މީހުން ވަނީ މާސޭއަށް އެއްވެފައެވެ. މަންޒަރު ބަލަން އެއްވި މީހުންގެ ތެރޭގައި ފްރާންސްގެ ރައީސް އިމޭނުއަލް މެކްރޮން ވެސް ހިމެނި ވަޑައިގަންނަވައެވެ.
އޮލިމްޕިކް ހުޅުކޮޅު ރިލޭ ފެށުމަށް ހަމަޖެހިފައިވަނީ 9 މޭ ވާ ބުރާސްފަތި ދުވަހުއެވެ. މެޑިޓެރޭނިއަން ކޯސްޓަލް ސިޓީއިން ފެށިގެން އޮލިމްޕިކް ހުޅުކޮޅު ފްރާންސް ވަށައިގެން ދަތުރުކުރުމަށްފަހު 26 ޖުލައި ވާ ދުވަހު ޕެރިސްގައި އޮންނަ އޮލިމްޕިކްސްގެ ފެށުމުގެ ރަސްމިއްޔާތަށް ހާޒިރުކުރެވޭނެއެވެ.
