އިޓާލިއަން ސެރިއާގައި ފްރޮޒަނޯން އަތުން 5-0 ގެ ތަފާތު ބޮޑު ނަތީޖާއިން އިންޓާ މިލާން މޮޅުވެއްޖެއެވެ.
ފްރޮޒަނޯންގެ ދަނޑު ކަމުގައިވާ ސްޓޭޑިއޯ ބެނީޓޯ ސްޓާޕްގައި ކުޅުނު މެޗުގައި އިންޓާގެ ފަރާތުން ފެނިފައިވަނީ ވަރުގަދަ ކުޅުމެކެވެ. އެގޮތުން މެޗުގެ 19 ވަނަ މިނެޓުގައި އިންޓާ ވަނީ ލަނޑު ޖަހާ ލީޑު ނަގާފައެވެ. މި ލަނޑު އެ ޓީމަށް ކާމިޔާބު ކޮށްދިނީ ޑޭވިޑް ފަރެޓްސީއެވެ. ފަރެޓްސީގެ ލަނޑާއެކު ފުރަތަމަ ހާފު ނިމުނީ 1-0 އިން އިންޓާ ކުރީގައި އޮވެގެންނެވެ.
ދެވަނަ ހާފުގެ 60 ވަނަ މިނެޓުގައި މާކޯ އާނައުޓޮވިޗް ވަނީ އިންޓާގެ ލީޑު ދެ ގޯލަށް އިތުރުކޮށްފައެވެ. އިންޓާގެ ތިން ވަނަ ލަނޑު ފެނިގެންގޮސްފައި ވަނީ މެޗުގެ 77 ވަނަ މިނެޓުގައެވެ. މި ލަނޑު ބަދަލު ކުޅުންތެރިޔެއް ގޮތުގައި އެރި ޓާޖޮން ބުކާނަންއެވެ.
މެޗުގެ 80 ވަނަ މިނެޓުގައި ލައުޓާރޯ މާޓިނޭޒް ވަނީ އިންޓާގެ ލީޑު ހަތަރު ގޯލަށް އިތުރުކޮށްދީފައެވެ. ލައުޓާރޯގެ މި ލަނޑަކީ އޭނާ ސެރިއާގައި ކާމިޔާބު ކުރި 24 ވަނަ ލަނޑެވެ. އޭނާއަކީ މި ސީޒަނުގައި ސެރިއާގައި އެންމެ ގިނަ ލަނޑު ޖަހާފައިވާ ކުޅުންތެރިޔާކަން ފާހަގަކޮށްލަން ޖެހެއެވެ.
އިންޓާގެ ފަހު ލަނޑު ފެނިގެންދިޔައީ މެޗުގެ 84 ވަނަ މިނެޓުގައެވެ. މި ލަނޑަކީ ފްރާންސްގެ ޒުވާން ސްޓަރައިކަރު މާކަސް ތުރަމް ކާމިޔާބު ކުރި ލަނޑެކެވެ. ތުރަމްގެ ލަނޑާއެކު އިންޓާއިން މެޗު ނިންމާލީ ފަސޭހަ ކަމާއެކު ފްރޮޒަނޯން ބަލިކޮށްފައެވެ.
މެޗުން މޮޅުވުމާއެކު އިންޓާއަށް ވަނީ ތާވަލުގެ އެއްވަނައިގައި 21 ޕޮއިންޓުގެ ލީޑެއް ނެގިފައެވެ. ސީޒަނުގައި ބާކީ އޮތީ އެންމެ ދެ މެޗު ކަމަށް ވާތީ, އެހެން ޓީމަކަށް އިންޓާ ފަހާލުމުގެ ފުރުސަތެއް ދެން ނެތެވެ. އެހެންކަމުން ސީޒަން ނުނިމުނު ކަމުގައިވިއަސް އިންޓާއަށް ވަނީ ސެރިއާގެ ޗެމްޕިއަންކަން ކަށަވަރުކުރެވިފައެވެ.
