މެލޭޝިއަން ފުޓުބޯޅަ ކުޅުންތެރިޔެއް ކަމުގައިވާ ފައިސަލް ހަލީމްއަށް ބަޔަކު އެސިޑުން ހަމަލާދީފިއެވެ.
ހަލީމްއަށް އެސިޑުން ހަމަލާ ދިނީ 5 މެއި ވީ އާދިއްތަ ދުވަހުއެވެ. އޭނާއަށް ހަމަލާ ދިން އިރު އޭނާ ހުރީ ޝޮޕިންގެ މޯލެއްގައި ކަމަށް މީޑިއާތަކުން ވަނީ ރިޕޯޓު ކޮށްފައެވެ. ހަލީމްއަށް ރައްދުވި މި ހަމަލާގައި އޭނާއަށް ވަނީ ހަތަރުވަނަ ޑިގްރީގެ ބާރންސްއާ ކުރިމަތި ލާންޖެހިފައެވެ. ހަލީމްއަށް ލިބުނު އަނިޔާގެ ސަބަބުން އޭނާއަށް ވަނީ ހަރަކާތްތެރިވެ އުޅުމުގެ އިތުރުން ވާހަކަދެއްކުމުން ވެސް ވަގުތީ ގޮތުން މަހްރޫމު ވެފައެވެ.
ހަލީމް ވަނީ މިދިޔަ ބުރާސްފަތި ދުވަހު ތިން ގަޑިއިރުގެ ސްކިން އެލޮގްރާފްޓިން ސާޖަރީއެއް ކޮށްފައެވެ. ޑޮކްޓަރުން ހާމަ ކުރާގޮތުގައި އެ ސާޖަރީ ވަނީ ވަރަށް ކާމިޔާބު ކަމާއެކު ފުރިހަމަވެފައެވެ. ހަލީމްއަށް މިހާރު އެކަނިން ހިނގާބިގާވެ އުޅެވޭކަމަށް ވެސް ޑޮކްޓަރުން ވަނީ ހަބަރުދީފައެވެ.
ހަލީމްގެ އިތުރުން މެލޭޝިއާގެ އެހެން ބައިވަރު ކުޅުންތެރިންނަށް ވެސް ފާއިތުވެދިޔަ ދެ ހަފްތާގައި ވަނީ އެކިއެކި ހަމަލާތައް ރައްދުވެފައެވެ. އެގޮތުން ޓްރެއިނިން ނިންމާފައި ގެއަށް ދިޔަ މަގުމަތީގައި ކުޅުންތެރިޔަކަށް ބަޔަކު ވަނީ ދަގަނޑު ހޮޅިއަކުން ހަމަލާދީފައެވެ. މެލޭޝިއާގައި ފުޓުބޯޅަ ކުޅުންތެރިންނަށް ކުރިމަތިވެފައިމިވާ ހަމަލާތަކުގެ ސަބަބެއް ފުލުހުންނަށް އަދި ހޯދިފައެއް ނުވެއެވެ.
