މި ސީޒަންގެ ނިޔަލަށް ހަމަވާ ކޮންޓްރެކްޓް ހަމަވުމުން ޕީއެސްޖީ ދޫކޮށްލާނެ ކަމަށް އެ ކްލަބުގެ ތަޖުރިބާކާރު ގޯލްކީޕަރު ކޭލޯ ނަވާސް އިއުލާނުކޮށްފިއެވެ.
ނަވާސް ޕީއެސްޖީ ދޫކޮށްލާނެ ކަން އިއުލާނުކުރީ އިންސްޓަގްރާމްގައި އޭނާ އާއްމު ކުރި ޕޯސްޓެއްގައެވެ. އެ ޕޯސްޓުގައި އޭނާ ވަނީ އެ ކްލަބުގައި އޭނާ ހޭދަކުރި ވަގުތުގައި އޭނާއަށް ސަޕޯޓުދިން ހުރިހާ ފޭނުންނަށް ޝުކުރު އަދާކޮށްފައެވެ.
"އަހަރެން ޕީއެސްޖީގައި ހޭދަ ކުރި ހުރިހާ ވަގުތެއް ވެސް ހޭދަ ކުރީ ވަރަށް އުފަލުގަ. އަހަރެން ވަރަށް އުފާކުރަން ކްލަބުގައި ހޭދަކުރި ވަގުތުގައި އަހަންނަށް ފޭނުންގެ ފަރާތުނަ ހިތްވަރު ލިބުނީމަ. އަހަރެން ވަރަށް ހިތްހަމަ ޖެހޭ މި ކްލަބަށް ޓަކައި ކުރެވުނު ހުުރިހާ މަސައްކަތަކަށް" ޕީއެސްޖީ ދޫކޮށްލާނެކަން އިއުލާނު ކުރަމުން ނަވާސް ބުންޏެވެ.
ނަވާސް ޕީއެސްޖީއާ ގުޅުނީ 2019 ވަނަ އަހަރުއެވެ. ރެއާލް މެޑްރިޑަށް ތިން ޗެމްޕިއަންސް ލީގު ހާސިލުކޮށްދިނުމުގައި މުހިއްމު ދައުރެއް އަދާ ކުރުމަށްފަހު ޕީއެސްޖީއަށް އައި ކަމުގައިވިއަސް ނަވާސްއަށް ޕީއެސްޖީގެ ފުރަތަމަ އެގާރައިގެ ކީޕަރުގެ ގޮތުގައި މާ ގިނަ ދުވަހަކު ނުހުރެވުނެވެ. ސަބަބަކީ ޕީއެސްޖީއިން އޭސީ މިލާނުގެ ހުނަރުވެރި ޖިއަންލުއީޖީ ޑޮނަރުއްމާ ގެނައުމާއެކު ނަވާސްއަށް ވަނީ އެއްވަނަ ކީޕަރުކަން ގެއްލިފައެވެ.
ނަވާސް ޕީއެސްޖީގައި ހޭދަކުރި ފަސް އަހަރުގައި ވަނީ ޕީއެސްޖީއަށް 113 މެޗު ކުޅެދީފައެވެ. ނަވާސް ވަނީ ޕީއެސްޖީގައި ހޭދަ ކުރި ވަގުތުގައި ނުވަ ތަށި ހާސިލުކޮށްފައެވެ. ޕީއެސްޖީ ދޫކޮށްލުމަށް ފަހު ނަވާސް ދެން ގުޅޭނީ ކޮން ކްލަބަކާ ކަމެއް އަދި އޭނާ ހާމަކޮށްފައެއް ނުވެއެވެ.
