އަރަބި ލީގު ކައުންސިލްގެ 33 ވަނަ ސެޝަން މިއަދު ބަހްރެއިންގެ ވެރިރަށް މަނާމާގައި ފަށައިފިއެވެ.
މި ސަމިޓުގައި އިސްރާއީލުން ޣައްޒާއަށް ދެމުންދާ ޙަމަލާތަކާއި ފަލަސްތީނުގެ ލޭއޮހޮރުވުން ހުއްޓުވައި، ފަލަސްތީނަށް ކުރިމަތިވެފައިވާ އިންސާނީ ކާރިސާ ނިމުމަކަށް ގެނައުމަށް ކުރެވެންހުރި މަސައްކަތްތަކާ ބެހޭގޮތުން މަޝްވަރާކުރުމަށް ވަނީ ހަމަޖެހިފައެވެ.
ފަލަސްތީނުގެ ރަފާހުގައި އިޒްރޭލުގެ އަސްކަރީ އޮޕަރޭޝަން ކުރިއަށް ދާތީ ޣައްޒާގެ ހާލަތު އިތުރަށް ގޯސްވެފައިވާއިރު، އެކަމާ ދެކޮޅަށް ބައިނަލްއަގުވާމީ މުޖުތަމައުން، ޙާއްސަކޮށް މުސްލިމު ގައުމުތަކުން ފިޔަވަޅުއަޅަން ވަނީ ލަސްވެފައިއެވެ.
މިދިޔަ ނޮވެމްބަރު މަހު ސައުދީ އަރަބިއްޔާގެ ރިޔާދުގައި 57 މެމްބަރުންހިމެނޭ އޯގަނައިޒޭޝަން އޮފް އިސްލާމިކް ކޯޕަރޭޝަން ބައްދަލުވެ އިސްރާއީލުން ޣައްޒާގައި ހިންގަމުންދާ އަނިޔާވެރި އަމަލުތައް ކުށްވެރިކުރައްވާފައެވެ. ނަމަވެެސް އެ ބައްްދަލުވުމުގައި އިސްރާއީލާ ދެކޮޅަށް އަދަބީ އިގްތިސާދީ އަދި ސިޔާސީ ގޮތުން އަޅަން ޖެހޭ ފިޔަވަޅުތައް އަޅަން އެއްބަސަވުމަކަށް އާދެވިފަކައި ނެތެވެ.
މީގެ އިތުރުން ސޫދާނުގައި މިހާރު ހިނގަމުންދާ ދާހިލީ ހަނގުރާމައަށް ވެސް މި ސަމިޓުގައި ހައްލު ހޯއްދަވައިދެއްވާނެ ކަމަށް ލީގު އޮފް އަރަބް ސްޓޭޓްސްގެ ސެކްރެޓަރީ ޖެނެރަލްގެ ތަރުޖަމާނު ޖަމާލް ރުޝްދީ ވިދާޅުވިއެވެ.
އަދި މި ސަމިޓުގައި ސޯމާލިއާގެ މައްސަލަހައްލުކޮށް، އިތިއޯޕިއާގެ އެދުންތަކާ ދެކޮޅަށް އެ ގައުމުގެ ސިޔާދަތު ދެމެހެއްޓުމަށް އެހީތެރިކަން ފޯރުކޮށްދޭނެ ކަމަށް އޭނާ ވިދާޅުވިއެވެ. ރުޝްދީ ވިދާޅުވީ ސޯމާލިއާގެ ބިމުގެ އެއްބަސްވުމަކީ ބާތިލް އެއްބަސްވުމެއް ކަމަށާއި އެއީ ސޯމާލިއާގެ އެއްބައިވަންތަކަމަށް ނުރައްކާވާ އެއްބަސްވުމެއް ކަމަށެވެ.
މީގެ އިތުރުން އަރަބި ގައުމުތަކުގެ ފެނުގެ ރައްކާތެރިކަމުގެ މައްސަލަ ވެސް ބަހްރެއިން ސަމިޓުގެ އެޖެންޑާގައި އޮންނާނެ ކަމަށް ރުޝްދީ ވިދާޅުވިއެވެ. އަރަބި ލީގާ ގުޅިފައިވާ ސައިބާ ސެކިއުރިޓީގެ އާ ކައުންސިލެއް އުފެއްދުމާ ބެހޭ ގޮތުންވެސް މަޝްވަރާ ކުރައްވާނެ ކަމުގެ އިޝާރާތެއް އޭނާ ދެއްވިއެވެ.
ސަމިޓުގައި ބައިވެރިވުމަށް އަރަބި ދުނިޔޭގެ ލީޑަރުން ބަހްރެއިންއަށް ބުދަދުވަހުން ފެށިގެން އަންނަނީ ޖަމާވަމުންނެވެ.
