މި އަހަރުގެ ޖޫން މަހު ފެށުމަށް ހަމަޖެހިފައިވާ ޔޫރޯއަށް ގެންދާ ސްކޮޑު ޖަރުމަނު, ފްރާންސް އަދި ނެދަލޭންޑްސް އިއުލާނުކޮށްފިއެވެ.
ޔޫރޯ 2024 އަށް ގެންދާ ސްކޮޑު އެންމެ ފުރަތަމަ އިއުލާނު ކުރީ މުބާރާތުގެ ހޯސްޓު ކަމުގައިވާ ޖަރުމަނެވެ. ޖަރުމަނުގެ ސްކޮޑުގައި ތޯމަސް މުލާ, މެނުއަލް ނޯޔާ އަދި ދާދި ފަހުން ގައުމީ ޓީމުން ރިޓައާވުމަށްފަހު އެނބުރި އައި ޓޯނީ ކްރޫޒް ފަދަ ތަޖުރިބާކާރު ކުޅުންތެރިން ހިމެނެއެވެ. ނަމަވެސް ޖަރުމަނުގެ ސްކޮޑުގައި އެންމެ ފާހަގަ ކޮށްލެވޭ ކަމަކީ, ޑޯޓްމަންޑުގައި މޮޅު ކުޅުމެއް ދައްކަމުން އަންނަ ތަޖުރިބާކާރު ޑިފެންޑަރު މެޓް ހަމެލްސް ސްކޮޑުގައި ހިމެނިފައިނުވާ ކަމެވެ.
h
ފްރާންސްގެ ސްކޮޑަށް ބަލާލާއިރު އެ ޓީމުގައި އެންމެ ފާހަގަ ކޮށްލެވޭ ކަމަކީ ސައުދީގެ އަލްއިއްތިހާދަށް ކުޅެމުން އަންނަ އެންގޯލޯ ކާންޓޭ ސްކޮޑުގައި ހިމަނާފައިވާ ކަމެވެ. ކާންޓޭ ސްކޮޑުގައި ހިމެނުނު ކަމުގައިވިއަސް ފްރާންސްގެ އެންމެ ހުނަރުވެރި އެއް މިޑްފީލްޑަރު ކަމުގައިވާ ޕައުލް ޕޮގްބާ މި ފަހަރުގެ ޔޫރޯގައި ފެނިގެން ނުދާނެއެވެ. ޑޯޕިން މައްސަލައެއްގައި ހަތަރު އަހަރަށް ސަސްޕެންޑު ކޮށްފައި ހުރުމުގެ ސަބަބުން އޭނާއަށް މި އަހަރުގެ ޔޫރޯގަައި ބައިވެރިވުމުގެ ފުރުސަތު ވަނީ ގެއްލިފައެވެ. ފްރާންސްގެ ކޯޗު ޑިޑިއޭ ޑިޝާމްޕްސް ހާމަކުރި ގޮތުގައި މި ފަހަރުގެ ޔޫރޯގައި ފްރާންސްއަށް ކެޕްޓަންކަން ކޮށްދޭނީ ކިލިއަން އެމްބާޕޭއެވެ.
ނެދަލޭންޑްސްގެ ސްކޮޑު އިއުލާނު ކޮށްފައިވާއިރު އާސެނަލްގެ ޔޫރިއެން ޓިމްބާ ހިމެނިފައެއް ނުވެއެވެ. އޭނާއަށް ދިމާވި އިންޖަރީއެއްގެ ސަބަބުން މި އަހަރުގެ ޔޫރޯ ސްކޮޑުން އޭނާއަށް ޖާގަ ލިބިފައެއް ނުވެއެވެ. ރޮނަލްޑް ކޫމަން ކޯޗުގެ ގޮތުގައި ހަމަޖައްސައިގެން ޔޫރޯއަށް ނިކުންނަ ނެދަލޭންޑްސްއަށް މުބާރާތުގައި ކެޕްޓަން ކޮށްދޭނެ ކަމަށް ބެލެވެނީ ލިވަޕޫލުގެ ހުނަރުވެރި ޑިފެންޑަރު ވާޖިލް ވެން ޑައިކެވެ.
ޖަރުމަނުގައި ކުރިއަށް ގެންދިޔުމަށް ހަމަޖެހިފައިވާ ޔޫރޯ ކުރިއަށް ދިއުމަށް ހަމަޖެހިފައިވަނީ ޖޫން މަހުގެ 14 ވަނަ ދުވަހުން ފެށިގެން ޖުލައި މަހުގެ 14 ވަނަ ދުވަހުގެ ނިޔަލަށެވެ. މުބާރާތުގެ އެންމެ ފުރަތަމަ މެޗުގައި ކުޅޭނީ ޖަރުމަނާއި ސްކޮޓްލޭންޑެވެ.
