މި ސީޒަން ނިމުމުން, ބްރައިޓަންގެ ކޯޗު ކަމުގައިވާ ރޮބާޓޯ ޑިޒާބީ އެ ކްލަބު ދޫކޮށްލާނެ ކަމަށް އިއުލާނުކޮށްފިއެވެ.
އިޓަލީއަށް ނިސްބަތްވާ ކޯޗެއް ކަމުގައިވާ ޑިޒާބީ ބްރައިޓަންއާ ގުޅުނީ 2022 ވަނަ އަހަރުއެވެ. އޭރު ބްރައިޓަންގެ ކޯޗު ކަމުގައިވާ ގްރޭމް ޕޮޓާ ޗެލްސީއަށް ސޮއި ކުރުމާއެކު ބްރައިޓަންގެ ކޯޗު ކަމާ ހަވާލުވެ ޑިޒާބީ ވަނީ އެ ޓީމު ޔޫރޮޕާ ލީގުގެ ރައުންޑް އޮފް 16 އާ ހަމައަށް ގެންގޮސްދީފައެވެ.
ޑިޒާބީ އެ ކްލަބު ދޫކޮށްލާން ކަމަށް އިއުލާނު ކުރަމުން ބްރައިޓަންއިން ނެރުނު ބަޔާނުގައި ވަނީ ޑިޒާބީ އެ ކްލަބުގައި ހޭދަކުރި ދެ ސީޒަނުގައި ކްލަބުގެ ކުރިއެރުމަށް ކޮށްދިން މަސައްކަތްތަކަށް ޝުކުރު އަދާކޮށްފައެވެ.
"ޑިޒާބީ ވަނީ މި ފުޓުބޯޅަ ކްލަބަށް ވަރަށް ފުރިހަމަކަމާއެކު ދެ ސީޒަނުގައި ކޯޗުކަން ކޮށްދީފަ. މި ދެ ސީޒަނުގައި ޑިޒާބީ ވަނީ މި ފުޓުބޯޅަ ކްލަބުގެ ތާރީހުގައި ފުރަތަމަ ފަހަރަށް ޔޫރޮޕާ ލީގަށް ވާސިލުކޮށްދީ, ކްލަބު އާ އުސްމިންތަކަކަށް ގެންގޮސްދީފަ" ޑިޒާބީ ބްރައިޓަން ދޫކޮށްލާނެކަން އިއުލާނު ކުރި ބަޔާނުގައި ބްރައިޓަންއިން ހާމަކުރިއެވެ.
ޑިޒާބީ މި ސީޒަން ނިމުމަށްފަހު ގުޅޭނީ ކޮން ކްލަބަކާ ކަމެއް އަދި ހާމަކޮށްފައެއް ނުވެއެވެ. ސީޒަނުގެ ކުރީ ކޮޅު ބަޔާނުން ޑިޒާބީގެ ސޮއި ހޯދުމަށް މަސައްކަތް ކުރި ކަމުގައިވިއަސް އޭޕްރީލް މަހުގައި ބަޔާނުން ވަނީ އެ މަސައްކަތް ހުއްޓާލާފައެވެ. އެހެންކަމުން ދެން ޑިޒާބީ ގުޅޭނީ ކޮން ޓީމަކާ ކަމެއް އަދި ޔަގީނެއް ނުވެއެވެ.
