ސިންގަޕޫރު އެއާލައިނު (އެސްއައިއޭ) ގައި މަސައްކަތް ކުރާ މުވައްޒަފުންނަށް އަށް މަހުގެ މުސާރަ ބޯނަސްގެ ގޮތުގައި ދޭން އެ އެއާލައިނުން ނިންމައިފިއެވެ.
އެސްއައިއޭއިން މި ދިޔަ ބުދަ ދުވަހު ހާމަކުރި ގޮތުގައި އެ އެއާލައިނަށް ވަނީ މި އަހަރު ރެކޯޑު އަދަދެއްކަމުގައިވާ 1.98 ބިލިއަން ޑޮލަރުގެ ފައިދާއެއް ލިބިފައެވެ. އެއާލައިނުން ހާމަކުރާ ގޮތުގައި މިހާ ބޮޑު ފައިދާއެއް ލިބުނީ ދެކުނު އޭޝިއާގެ ގައުމުތަކުން ކޮވިޑްގެ ބަލިމަޑުކަމަށްފަހު މި އަހަރު އެއްކޮށް ބޯޑަރުތައް ހުޅުވާލަން ނިންމުމުން ކަމުގައެވެ.
އެސްއައިއޭގެ ސީނިއާ އެގްޒެކަޓިވް އޮފިސަރު ގޯއް ޗޫން ފޮންގް ހާމަކުރި ގޮތުގައި މި ބޯނަސް މުވައްޒަފުންނަށް ދޭން ނިންމީ އެ މުވައްޒަފުން އެއާލައިނު ކުރިއަށް ގެންދިއުމަށް ކުރި ބުރަ މަސައްކަތާއި ގުރުބާނީގެ އަގު ވަޒަން ކުރުމުގެ ގޮތުންނެވެ.
"މުވައްޒަފުންނަށް މިހާ ބޮޑު ބޯނަސްއެއް ދޭން ނިންމީ އެ ފަރާތްތަކުން ސިންގަޕޫރު އެއާލައިންސްގެ ހިދުމަތްތައް އެންމެ ފުރިހަމަ ގޮތުގައު ކުރިއަށް ގެންދިއުމަށް ކުރެއްވި ބުރަ މަސައްކަތުގެ އަގު ވަޒަން ކުރަން. އެއާލައިނުގެ މުވައްޒަފުންގެ ބުރަ މަސައްކަތުގެ ސަބަބުން ކޮވިޑްގެ ބަލިމަޑުކަމަށްފަހު އެއާލައިނަށް އިތުރު ކުރިއެރުންތަކެއް ލިބިގެންގޮސްފި" މުވައްޒަފުންނަށް ދިން ބޯނަސްއާ ބެހޭ ގޮތުން ވާހަކަދައްކަމުން ފޮންގް ބުންޏެވެ.
އެސްއައިއޭއަކީ ދުނިޔޭގެ އެންމެ މަގްބޫލު އެއް އެއާލައިނެވެ. ސްކައިޓްރެކްސް ވޯލްޑް އެއާލައިނުން ކޮންމެ އަހަރަކު އެންމެ ފުރިހަމަ އެއާލައިނަށް ދެމުން އަންނަ "ބެސްޓް އެއާލައިން" އެވޯޑު އެސްއައިއޭއިން ޖުމްލަ ހަ ފަހަރަށް ކާމިޔާބު ކޮށްފައިވާއިރު, މި ދިޔަ އަހަރުގެ އެންމެ ފުރިހަމަ އެއާލައިނަށް ވެސް ހޮވިފައިވަނީ ސިންގަޕޫރު އެއާލައިނެވެ.
