ޕޯޗުގަލް އަދި އިނގިރޭސި ވިލާތުގެ ޔޫރޯ ސްކޮޑު އެ ދެ ގައުމުން އިއުލާނުކޮށްފިއެވެ.
2016 ވަނަ އަހަރުގެ ޗެމްޕިއަނުން ކަމުގައިވާ ޕޯޗުގަލް ނިކުންނާނީ ރޮބާޓޯ މާޓިނޭޒް ކޯޗެއްގެ ގޮތުގައި ހަމަޖައްސައިގެންނެވެ. މިއީ މާޓިނޭޒް ޕޯޗުގަލްގެ ކޯޗުގެ މަގާމުގައި ހުރެގެން ކުޅޭ ފުރަތަމަ ބޮޑު މުބާރާތެވެ.
ޕޯޗުގަލްގެ ސްކޮޑުގައި ސުޕާސްޓާ ކްރިސްޓިއާނޯ ރޮނަލްޑޯ ވަނީ ހިމެނިފައެވެ. ގައުމީ ފެންވަރުގައި އެންމެ ގިނަ ގޯލު ކާމިޔާބު ކޮށްފައިވާ ރޮނަލްޑޯ މި އަހަރުގެ ޔޫރޯގައި ކުޅެފިނަމަ, ހަ ފަހަރަށް ޔޫރޯގައި ބައިވެރިވި ހަމައެކަނި ކުޅުންތެރިޔާއަށް ވާނެއެވެ.
ޕޯޗުގަލްގެ ސްކޮޑުގައި ހިމެނެނީ 3 ގޯލްކީޕަރުން, 9 ޑިފެންޑަރުން, 7 މިޑްފީލަޑަރުން އަދި 7 ފޯވާޑުންނެވެ.
އިނގިރޭސި ވިލާތުގެ ސްކޮޑަށް ބަލާލާއިރު އެންމެ ފާހަގަ ކޮށްލެވޭ ކަމަކީ މާކަސް ރަޝްފޯޑު އަދި ޖޯޑަން ހެންޑަސަން ޓީމުގައި ހިމެނިފައިނުވާ ކަމެވެ. އޭގެ އިތުރުން ޗެލްސީގެ ދެ ކުޅުންތެރިން ކަމުގައިވާ ރީސް ޖޭމަސް އަދި ބެން ޗިލްވެލް ވެސް ހިމެނިފައެއް ނުވެއެވެ.
ކުރިން އިނގިރޭސި ވިލާތުގައި އާއްމުކޮށް ފެންނަ ބައިވަރު ކުޅުންތެރިންނަށް ސްކޮޑުން ފުރުސަތު ނުލިބުނުއިރު, އިނގިރޭސި ވިލާތުގެ ގައުމީ ޓީމުގެ ކޯޗު ވަނީ ވަރަށް ގިނަ ޒުވާން ކުޅުންތެރިންނަށް ފުރުސަތު ދީފައެވެ. އޭގެ ތެރޭގައި ފާހަގަކޮށްލެވެނީ ލިވަޕޫލުގެ ޖަރެލް ކުއަންސާ, އެވަޓޮންގެ ޖެރަޑް ބްރެންތުވެއިޓު އަދި ކްރިސްޓަލް ޕެލޭސްގެ އެޒޭއެވެ.
