އޭޝިއަން މިޓްސުބިޝީ އެލެކްޓްރިކް (އޭއެފްއެފް) ކަޕު ނޮވެންބަރު މަހު ފެށުމަށް ހަމަޖެހިއްޖެއެވެ.
15 ވަނަ އޭއެފްއެފް ކަޕު ނޮވެންބަރު މަހުގެ 23 ވަނަ ދުވަހު ފެށުމަށް ހަމަޖެހިފައިވާއިރު މި ފަހަރުގެ މުބާރާތުގައި ޖުމްލަ 10 ޓީމެއް ބައިވެރިވެެއެވެ. މުބާރާތުގައި ބައިވެރިވާ ކަން ޔަގީން ވެފައިވާ ޓީމުތަކަކީ ކެމްބޯޑިއާ, މެލޭޝިއާ, ސިންގަޕޯ, ތައިލެންޑް, އިންޑޮނޭޝިއާ, ލާއޯސް, މިޔަންމާ, ފިލިޕީންސް އަދި ވިއެޓްނާމެވެ. މުބާރާތުގެ ބާކީ ޖާގަ ލިބޭނީ ސެޕްޓެމްބަރު މަހު ބްރުނެއި އަދި ޓީމޯ ލެސްޓޭ ބައްދަލުކުރާ ކޮލިފައިންގެ މެޗު ކާމިޔާބު ކުރާ ޓީމަށެވެ.
މުބާރާތް ކުރިއަށްދާން ހަމަޖެހިފައިވަނީ ޓީމުތައް ދެ ގްރޫޕަކަށް ބަހާލައިގެންނެވެ. ދެ ގްރޫޕުން އެންމެ މަތިން ނަތީޖާ ނެރޭ ދެ ޓީމު ދަތުރުކުރާނީ މުބާރާތުގެ ސެމީ ފައިނަލަށެވެ. ސެމީ ފައިނަލުގައި ދެ ލެގު ކުޅޭއިރު ފައިނަލުގެ ވެސް ދެ ލެގު ކުޅެން ވަނީ ހަމަޖެހިފައެވެ.
މުބާރާތުގެ އެންމެ ފުރަތަމަ މެޗުތައް 23 ނޮވެންބަރުގައި ފަށާއިރު ފުރަތަމަ އޮންނާނީ ކެމްބޯޑިއާ އަދި މެލޭޝިއާ ބައްދަލު ކުރާ މެޗާއި ތައިލޭންޑް އަދި ބްރުނެއި ނުވަތަ ޓީމޯ ލެސްޓޭ ބައްދަލު ކުރާ މެޗެވެ.
