ކެނެޑާގެ މަޝްހޫރު ބިލިއަނަރު އަދި ކެރީބިއަން ޕްރިމިއާ ލީގު (ސީޕީއެލް) ގެ ބާނީ އަޖްމަލް ހަސަން ޚާން ހާޓެއް އެޓޭކެއް ޖެހުމުގެ ސަބަބުން މަރުވެއްޖެއެވެ.
އަޖްމަލް މަރުވެފައި ވަނީ އޭނާ ޗުއްޓީ ހޭދަކުރަމުންދިޔަ ދުބާއީގައި ހުންނަ ޕާމް ޖުމެއިރާގެ ފަސް ތަރީގެ ހޮޓަލުގެ ޖިމުގައި ކަސްރަތުކޮށް ނިންމިލިތާ މާގިނައިރުތަކެއްނުވެ އުޅެނިކޮށް ކަމަށް ދުބާއީގެ ނޫސްތަކުން ބުނެއެވެ. އަދި މިހާރު އޭނާގެ ހަށިގަނޑު ކެނެޑާއަށް ފޮނުވާލުމުގެ މަސައްކަތް ދަނީ ކުރަމުންނެވެ.
އިންޑިޔާގެ ލަކްނޯގެ މަޝްހޫރު އާއިލާއަކަށް ނިސްބަތްވާ އަޖްމަަލްއަކީ އަކީ ތިންފިރިހެން ދަރިންތިބި އެއާއިލާގެ އެންމެ ދޮށީ މީހާއެވެ. އަދި ވެރަސް ގްރޫޕް އޮފް ކޮމްޕެނީސްގައި އިސްކޮށް އުޅުއްވި ބޭފުޅެކެވެ. 2013 ވަނަ އަހަރު ސީޕީއެލް ތައާރަފްކޮށް، ހޮލީވުޑްގެ އެކްޓަރު މާކް ވަހްލްބާގް ފަދަ ބައިނަލްއަގުވާމީ ސަމާލުކަމާއި އިންވެސްޓްމަންޓްތައް ހޯދުމުން އޭނާ އަށް ވަނީ ފާހަގަކޮށްލެވޭ ތައުރީފެއް ލިބިފައެވެ.
އަޖްމަލް އިންގްލެންޑުގައި ދުވަސްތައް ހޭދަކުރުމަށްފަހު ފާއިތުވެދިޔަ ގިނަ ދުވަސްތައް މައިގަނޑު ގޮތެއްގައި ދިރިއުޅުއްވީ ބާބަޑޯސްގައެވެ. އަޖްމަލް މަރުވުމާ ގުޅިގެން އޭނާގެ އާއިލާއަށާއި އޭނާ ގާތްކަން ބޭއްވި ބޮޑު މުޖުތަމައުއަށް ވަނީ ވަރަށް ބޮޑަށް އަސަރުކޮށްފައެވެ.
އަޖްމަލްގެ ކަށުނަމާދު އޮތީ އަންނަ ހޮނިހިރު ދުވަހު ކެނެޑާގެ މިސިސައުގާގެ މީޑޯވެލްގައެވެ.
