މި އަހަރު ކުރިއަށްދާ ޔޫރޯއަށް ނެރޭ ސްކޮޑު ސްޕެއިން އިއުލާނުކޮށްފިއެވެ.
ސްޕެއިން އިއުލާނުކުރީ 29 ކުޅުންތެރިންގެ ސްކޮޑެކެވެ. ޔޫރޯއަށް ހުއްދަވަނީ 26 ކުޅުންތެރިންގެ ސްކޮޑެއް ކަމަށް ވާތީ އަދި މި ލިސްޓުން ތިން ކުޅުންތެރިން އުނިކުރެވިގެން ދާނެއެވެ.
ސްޕެއިންގެ ސްކޮޑަށް ބަލާލާއިރު އެންމެ ފާހަގަކޮށްލެވޭ ކަމަކީ އެސްޓަން ވިލާގެ ޑިފެންޑަރު ޕައު ޓޮރޭސް އަދި ޓޮޓެންހަމްގެ ޑިފެންޑަރު ޕެޑަރޯ ޕޯރޯ ސްކޮޑުގައި ހިމެނިފައިނުވާ ކަމެވެ.
ސްޕެއިންގެ ސްކޮޑުގައި ވަރަށް ގިން ޒުވާން ކުޅުންތެރިންނަށް ވަނީ ފުރުސަތު ލިބިފައެވެ. ބާސެލޯނާގެ ދެ ތަރިން ކަމުގައިވާ, އެންމެ 16 އަހަރުގެ ލަމީން ޔަމާލް އަދި 17 އަހަރުގެ ޕައު ކުބާސީއަށް ވަނީ ސްކޮޑުން ޖާގަ ލިބިފައެވެ. ބާސާގެ އެހެން ތަރިއެއް ކަމުގައިވާ ފާމިން ލޯޕޭޒްއަށް ވަނީ ފުރަތަމަ ފަހަރަށް ސްޕެއިންގެ ސީނިއާ ޓީމުގެ ލިސްޓުގައި ހިމެނިފައެވެ.
ސްޕެއިން މި އަހަރުގެ ޔޫރޯގައި ވާދަކުރަނީ ގްރޫޕު "ބީ" ގައެވެ. ސްޕެއިންގެ އިތުރުން މި ގްރޫޕުގައި ހިމެނެނީ އިޓަލީ, ކްރޮއޭޝިއާ އަދި އަލްބޭނިއާއެވެ. ސްޕެއިން ޔޫރޯގެ ފުރަތަމަ މެޗު ކުޅޭނީ 15 ޖޫން ވާ ދުވަހު 21:00 ގައެވެ. މި މެޗުގައި ސްޕެއިން ނިކުންނާނީ ކްރޮއޭޝިއާއާ ދެކޮޅަށެވެ.
