މި އަހަރު އޮންނަ ޔޫރޯއަށް ނެރޭ ސްކޮޑު ބެލްޖިއަމްއިން އިއުލާނުކޮށްފިއެވެ.
ބެލްޖިއަމްއިން އިއުލާނުކުރި 25 ކުޅުންތެރިންގެ ސްކޮޑުގައި އެންމެ ފާހަގަކޮށްލެވޭ ކަމަކީ އެ ގައުމުގެ އެންމެ ހުނަރުވެރި ގޯލްކީޕަރު ކަމުގައިވާ ތީބުއާ ކޯޓުއާ ސްކޮޑުގައި ހިމެނިފައިނުވާކަމެވެ. އަނިޔާގެ ސަބަބުން އެތައް ދުވަހެއް ވަންދެން ކުޅުމުން ބޭރުގައި ކޯޓުއާއަށް ހުންނަން ޖެހިފައިވާތީ ބެލްޖިއަމްގެ ކޯޗު ޑޮމިނިކޯ ޓެޑެސްކޯ ވަނީ އޭނާ ސްކޮޑުގައި ނުހިމަނަން ނިންމާފައެވެ.
ކޯޓުއާ ހިމެނިފައިނުވި ކަމުގައިވިއަސް ނަން މަޝްހޫރު ބައިވަރު ކުޅުންތެރިން ވަނީ ބެލްޖިއަމްގެ ސްކޮޑުގައި ހިމެނިފައެވެ. މެންޗެސްޓާ ސިޓީގެ ދެ ތަރިން ކަމުގައިވާ ކެވިން ޑިބްރުއިނާ އާއި ޖެރެމީ ޑޯކޫ ހިމެނިފައިވާއިރު އާސެނަލްގެ ލިއަންޑްރޯ ޓްރޮސާޑްއަށް ވެސް ވަނީ ސްކޮޑުން ޖާގަ ލިބިފައެވެ.
މި އަހަރުގެ ޖޫން މަހު ފެށޭ ޔޫރޯގައި ބެލްޖިއަމް ކުރިމަތިލާން ޖެެހެނީ ގްރޫޕު "އީ" ގައެވެ. ބެލްޖިއަމްގެ އިތުރުން މި ގްރޫޕުގައި ހިމެނެނީ ސްލޮވާކިއާ, ޔޫކްރެއިން އަދި ރޮމޭނިއާއެވެ. މުބާރާތުގެ ފުރަތަމަ މެޗަށް ބެލްޖިއަމް ނިކުންނާނީ 17 ޖޫން ވާ ދުވަހުގެ 21:00 ގައެވެ. މި މެޗުގައި ބެލްޖިއަމް ވާދަކުރާނީ ސްލޮވާކިއާއާއެވެ.
