ފްރާންސްގެ ސުޕާސްޓާ ކިލިއަން އެމްބާޕޭއަށް އޭޕްރީލް މަހުގެ މުސާރަ ދޭން ޕީއެސްޖީއިން ދެކޮޅު ހަދައިފިއެވެ.
ފްރާންސްގެ މީޑިއާއެއް ކަމުގައިވާ "ލެކިޕޭ" ހާމަކުރާ ގޮތުގައި ޕީއެސްޖީ ވަނީ އެމްބާޕޭއަށް އޭޕްރީލް މަހުގެ މުސާރައިގެ އިތުރުން ބޯނަސްގެ ގޮތުގައި ދޭން ޖެހޭ ބައެއް ފައިސާ ދޭން ދެކޮޅު ހަދާފައެވެ.
ޕީއެސްޖީއިން އެމްބާޕޭއަށް މުސާރަ ދޭން ދެކޮޅު ހެދި ސަބަބަކީ މި ދިޔަ ފެބްރުއަރީ މަހު އެ ކްލަބުން އެމްބާޕޭއަށް ދެއްކި 80 މިލިއަން ޔޫރޯގެ ބޯނަސްގެ ބަދަލު ރެއާލް މެޑްރިޑުން ޕީއެސްޖީއަށް ނުދޭނެ ކަމަށް ބުނުމުންނެވެ.
މި ބޯނަސްއަކީ, މި ދިޔަ އަހަރުގެ އޮގަސްޓު މަހު ކޮންޓްރެކްޓް އާ ނުކުރުމުގެ ސަބަބުން އެމްބާޕޭ ފުރަތަމަ ޓީމާއެކު ފަރިތަކުރުން މަނާ ކުރުމުން, އެނބުރި ފުރަތަމަ އެގާރައަށް ވަނުމަށް ޓަކައި ނުހިފާ ދޫކޮށްލަން އޭނާ ނިންމި ބޯނަސްއެކެވެ. ނަމަވެސް މި އަހަރުގެ ފެބްރުއަރީ މަހު ޕީއެސްޖީގެ ރައީސް ނާސިރް އަލްހެލައިފީ ވަނީ އެމްބާޕޭއަށް އެ ބޯނަސް ދައްކާފައެވެ.
އެ ބޯނަސް އެމްބާޕޭއަށް ދެއްކުމަށްފަހު އަލްހެލައިފީ ވަނީ ރެއާލް މެޑްރިޑުން އެ ބޯނަސްގެ ޖުމްލަ 80 މިލިއަން ޔޫރޯ ޕީއެސްޖީއަށް ދައްކަން ޖެހޭނެ ކަމަށް ބުނެފައެވެ. އަލްހެލައިފީގެ މި އެދުމަށް ރެއާލް މެޑްރިޑުގެ ރައީސް ފްލޮރެންޓީނޯ ޕެރޭޒް ދެކޮޅު ހެދުމާއެކު އޭނާ ވަނީ އެމްބާޕޭއަށް އޭޕްރީލް މަހުގެ މުސާރަ އާއި ދޭން ޖެހޭ ބައެއް ބޯނަސްތައް ދިނުމަށް ދެކޮޅު ހަދާފައެވެ.
އެމްބާޕޭގެ ގާނޫނީ ވަކީލުން އަންނަނީ އޭނާއަށް ލިބެން ޖެހޭ މުސާރަ ހޯދުމަށް ޓަކައި މަސައްކަތް ކުރަމުންނެވެ. އޭނާގެ ގާނޫނީ ވަކީލުން އަންނަނީ ޕީއެސްޖީގެ ގާނޫނީ ވަކީލުންގެ ޓީމާއި ވާހަކަދައްކާ, މި މައްސަލައަށް ހައްލެއް ހޯދުމަށް މަޝްވަރާ ކުރަމުންނެވެ.
