މިދިޔަ ހަތަރު ދުވަހުގެ ތެރޭގައި ރަފަޙްގައި ކަނޑައަޅާފައިވާ "ސޭފް ޒޯން" ތަކަށް ޒަޔަނިސްޓް އިސްރާއީލުން ދިން ހަމަލާތަކުގައި ފަލަސްތީނުގެ 66 މީހަކު ޝަހީދު ކޮށްލާފައިވާ ކަމަށް އެހީ ފޯރުކޮއްދޭ ޖަމާއަޓް ކަމަށްވާ ސޭވް ދަ ޗިލްޑްރަން އިން ބުނެފިއެވެ.
ޝަހީދު ކޮށްލި މީހުންގެ ތެރޭގައި ކުޑަކުދިންނާއި އަންހެނުން ވެސް ހިމެނޭ އިރު، ރަފާޙްއާއި ޣައްޒާގައި އާންމުންގެ ރައްކާތެރިކަމަށް އަވަސް ފިޔަވަޅުތަކެއް އެޅުމަށް ގޮވާލާ އަޑުތައް ވަނީ ގަދަވެފައެވެ.
މި ހަމަނުޖެހުންތައް އިތުރުވެފައި މިވަނީ ރަފާގައި އިޒްރޭލުން ދެމުން ގެންދާ ހަމަލާތައް ހުއްޓާލުމަށް އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން އިޒްރޭލަށް އަންގާފައި ވަނިކޮށެވެ. ފަލަސްތީނުގެ ސޭވް ދަ ޗިލްޑްރަންސް ކަންޓްރީ ޑައިރެކްޓަރު ޒޭވިއާ ޖައުބާޓް ވަނީ މި މައްސަލަ އިތުރަށް ހޫނުވަމުންދާތީ ވަރަށް ބޮޑަށް ކަންބޮޑުވުން ފާޅުކުރައްވާފައެވެ.
"ޣައްޒާގައި ކުޑަކުދިންނާއި ޢާއިލާތަކަށް އެއްވެސް ހާލެއްގައި ރައްކާތެރި ތަނެއް ނެތްކަން ދެއްކުމަށް ލީޑަރުން ބޭނުންވަނީ އިތުރު ކޮން ހެއްކެއްހެއްޔެވެ؟" ޖޫބާޓް ސުވާލު ކުރިއެވެ. "އެމީހުން ދާއިމީކޮށް، އަބަދުވެސް ފުރާނަ އަށް ޓަކައި ފިލައިގެން ދަނީ، އެއް ނުރައްކަލުގެ ސަރަހައްދުން އަނެއް ނުރައްކަލުގެ ސަރަހައްދަށް. އަދި އެމީހުން ފިލައިގެން ދަނީ ރޭންޑަމްކޮށް ނޫން - އެމީހުން ދަނީ އިޒްރޭލުން "އަމިއްލަ ސަލާމަތަށްޓަކައި" ދާން އެންގި ސަރަހައްދުތަކަށެވެ. ދެން އެމީހުންނަށް ހަމަލާދެނީ."
ޖޯބާޓް ވަނީ ބޮމުގެ ހަމަލާތަކުން ސަލާމަތްވެ، ބަނޑުހައިހޫނުކަމާއި، ނަފްސާނީ އަދި ޖިސްމާނީ ބޮޑެތި އަނިޔާތަކާ ކުރިމަތިލާން ޖެހިފައިވާ މީހުންގެ ހިތްދަތިކަން ފާހަގަކުރައްވާފައެވެ. ކުޑަކުދިންގެ ނަފްސާނީ އަދި ޖިސްމާނީ ދުޅަހެޔޮކަން ބްރޭކިން ޕޮއިންޓަށް ވުރެ މައްޗަށް ގޮސްފަވާ ކަމަށާއި، ހަމަނުޖެހުންތައް ހުއްޓުވައި އިންސާނީ ކާރިސާއަށް ހައްލެއް ހޯދުމަށް ބައިނަލްއަގްވާމީ ނުފޫޒު ފޯރުވަން ޖެހޭ ކަމަށް ޖޫބާޓް ވިދާޅުވިއެވެ.
