އިޓަލީގެ ތަޖުރިބާކާރު ޑިފެންޑަރު ލިއޮނާޑޯ ބޮނޫޗީ ފުޓުބޯޅައިން ރިޓައާވުމަށް ނިންމާފިއެވެ.
ފުޓުބޯޅައިން ރިޓައާވުމަށް ނިންމި ނިންމުން އިއުލާނުކުރަން ސޯޝަލް މީޑިއާއަށް އާއްމު ކުރި ވީޑިއޯގައި ބޮނޫޗީ ވަނީ, އޭނާގެ ފުޓުބޯޅަ ކެރިއަރާ މެދު ވަރަށް ހިތްހަމަޖެހޭ ކަމަށް ހާމަކޮށްފައެވެ.
"އަހަރެން ކުޑައިރު ހުވަފެންތައް ބެލިން މިހާ ފުރިހަމަ ކެރިއަރެއް ލިބޭނެ ކަމަށް. އަހަރެން އަމިއްލަ ނަފްސަށް އަބަދު ވެސް ވައުދުވިން ހުރިހާ އަޑިގުޑަންތަކަކާ ވެސް ހިތްވަރާ އަޒުމާއެކު ކުރިމަތިލުމަށް" ފުޓުބޯޅައިން ރިޓައާވުމަށް ނިންމިކަން އިއުލާނުކުރަމުން ބޮނޫޗީ ބުންޏެވެ.
ބޮނޫޗީ މި ދިޔަ ސީޒަނުގައި ކުޅުނީ ތުރުކީގެ ކްލަބެއް ކަމުގައިވާ ފެނާބާޗޭއަށެވެ. މި އަހަރުގެ ޖަނަވަރީ މަހު, ބޮނޫޗީ ކުރިން ކުޅުނު ކްލަބު ކަމުގައިވާ ޔޫނިއޮން ބާލިން ދޫކޮށް ފެނާބާޗޭއާ ގުޅުނީ މި އަހަރު އޮންނަ ޔޫރޯގައި އިޓަލީގެ ސްކޮޑުން ފުރުސަތު ހޯދުމުގެ ބޭނުމުގައެވެ. ނަމަވެސް އިޓަލީގެ ކޯޗު ލޫސިއާނޯ ސްޕެލެޓީ ޔޫރޯއަށް އިއުލާނު ކުރި ސްކޮޑުން އޭނާއަށް ޖާގަ ނުލިބުމުން ބޮނޫޗީ ވަނީ ފުޓުބޯޅައިން ރިޓައާވުމަށް ނިންމާފައެވެ.
ބޮނޫޗީ ވަނީ އޭނާގެ ފުޓުބޯޅަ ކެރިއަރުގައި ޖުމްލަ 4 ޓީމަކަށް ކުޅެފައެވެ. އެއީ ޔުވެންޓަސް, އޭސީ މިލާން, ޔޫނިއޮން ބާލިން އަދި ފެނެބާޗޭއެވެ. ބޮނޫޗީ ވަނީ އޭނާގެ ފުޓުބޯޅަ ކެރިއަރުގައި މުޅިއަކު 19 ތަށްޓެއް ހާސިލުކޮށްފައެވެ. އޭގެ ތެރޭގައި އެންމެ ފާހަގަކޮށްލެވެނީ 2020 ވަނަ އަހަރު ކާމިޔާބު ކުރި ޔޫރޯއެވެ.
