ބޭންކް އޮފް މޯލްޑިވްސް (ބީއެމްއެލް) އިން އެމިރާތީ ދިރުހަމް (އޭއީޑީ) އާއި ޗައިނީސް ޔުއާން (ރެންމިންބީ) ގެ މުއާމަލާތްތައް ކުރެވޭނެ އިންތިޒާމް ހަމަޖައްސައިފިއެވެ.
މި މުއާމަލަތްތައް އިފްތިތާހުކުރެއްވީ ބޭންކް އޮފް މޯލްޑިވްސްގެ އަހަރީ އާންމު ޖަލްސާގައި އެ ބޭންކުގެ ސީއީއޯ އަދި މެނޭޖިން ޑިރެކްޓަރު ކާލް ސްޓަމްކޭއެވެ.
ބޭންކުގެ ފަހުގެ ކުރިއެރުންތަކާ މުހާތަބު ކުރައްވައި ސްޓެމްކޭ ވަނީ އޭއީޑީ އާއި ރެންމިންބީގައި މުއާމަލާތްކުރުމަށް މަގުފަހިކޮށްދޭ އާ ސިސްޓަމް ކޮންފިގްރޭޝަންގެ ވާހަކަ ފާހަގަކުރައްވާފައެވެ.
"ސެޓްލްމަންޓްތައް ހޯދުމަށާއި، މުސްތަޤްބަލުގައި ފައިސާ ދެއްކުމުގެ ޒިންމާތައް ރެންމިންބީއިން ކުރަން ބޭނުންވާ ކަސްޓަމަރުންނަށް އަޅުގަނޑުމެން މިހާރު ރެންމިންބީ އެކައުންޓްތައް ފޯރުކޮށްދެން" ސްޓަމްކޭ ވިދާލުވިއެވެ.
ކާލް ސްޓަމްކޭ ވަނީ ފާއިތުވި އަހަރެއްހާ ދުވަހުގެ ތެރޭގައި ބޭންކުން ހޯދާފައިވާ ގިނަ ކާމިޔާބީތަކާއި، ކަސްޓަމަރުންގެ ޚިދުމަތާއި، އިންފްރާސްޓްރަކްޗަރ އަދި ޑިޖިޓަލް ސޮލިއުޝަންތަކަށް ބޮޑެތި އިންވެސްޓްމަންޓްތަށް ފާހަގަކުރައްވާ، ދެމެހެއްޓެނިވި ގޮތެއްގައި އެ ކުންފުނި ހިނގުމާއި، މުޖުތަމަޢުގެ އެހީތެރިކަން ފޯރުކޮށްދިނުމުގައި ދެމިއޮންނާނެ ކަމުގެ ޔަޤީންކަން ދެއްވާފައެވެ.
އަދި މިކާމިޔާބީގެ ފަހަތުގައި ވަނީ ހަރުދަނާ ލިކުއިޑިޓީ މެނޭޖްމަންޓާއި ޓްރެޝަރީ ބިލްތަކަށް ކުރާ އިންވެސްޓްމަންޓްތައް އިތުރުވުމާއި ލޯނު ޕޯޓްފޯލިއޯ އިތުރުވަމުން ދިއުންކަމަށް ސްޓަމްކޭ ވިދާޅުވިއެވެ.
އެ ބޭންކުގެ ކަސްޓަމަރުންގެ ޑިޕޮސިޓް 1.6 ބިލިއަން ރުފިޔާއަށް އިތުރުވެ، މާކެޓުގެ 55 އިންސައްތަ ހިއްސާއާއެކު ރާއްޖޭގެ އެންމެ ކުރީގަ އޮތް ބޭންކުގެ މަގާމު ބީއެމްއެލް އަށް ލިބުމަކީ ކަސްޓަމަރުންގެ ވަރުގަދަ އިތުބާރު ދައްކުވައިދޭ ކަމެއްކަމަށްވެސް އެނާ ވިދާޅުވިއެވެ.
މުސްތަގުބަލަށް ބައްލަވާލައްވަމުން ސްޓެމްކޭ ވަނީ ރާއްޖޭގައި ބޭންކް އޮފް ޗޮއިސްގެ ގޮތުގައި ދެމިއޮތުމަށް ބޭންކުން ގެންގުޅޭ ވިސްނުން ފާހަގަކުރައްވާފައެވެ.
