ރެއާލް މެޑްރިޑާއެކު އާ ކޮންޓްރެކްޓެއްގައި ސޮއިކުރަން ސްޕެނިޝް މިޑްފީލްޑަރު ލޫކަސް ވަޒްކޭޒް ނިންމާފިއެވެ.
އިތުބާރުހުރި ޖާނަލިސްޓު ފަބްރީޒިއޯ ރޮމާނޯ ހާމަކުރި ގޮތުގައި ވަޒްކޭޒް ވަނީ އިތުރު އަހަރަކަށް ރެއާލުގައި މަޑުކުރުމުގެ ނިޔަތުގައި އާ ކޮންޓްރެކްޓެއްގައި ސޮއިކުރަން ނިންމާފައެވެ. 32 އަހަރުގެ ތަޖުރިބާކާރި ވަޒްކޭޒަށް ރެއާލުން ހުށައެޅި އާ ކޮންޓްރެކްޓަކީ 2025 ވަނަ އަހަރުގެ ޖޫން މަހަށް ހަމަވާ ކޮންޓްރެކްޓެކެވެ.
ފަބްރީޒިއޯ ހާމަކުރި ގޮތުގައި ވަޒްކޭޒް ވަނީ އެހެން ކްލަބުތަކުން އޭނާއަށް އައި އޮފާތައް ގަބޫލުކުރަން ދެކޮޅު ހަދާފައެވެ. ވަޒްކޭޒްގެ އަމާޒަކީ ރެއާލުގައި މަޑުކޮށް, އެ ކްލަބަށް ކާމިޔާބީތައް ހާސިލުކޮށްދިނުމެވެ.
ރެއާލް މެޑްރިޑުގެ ޔޫތު އެކަޑަމީއިން ކުރިއަރައިގެން އައި ވަޒްކޭޒް, 2015 ވަނަ އަހަރު ފުރަތަމަ ޓީމާ ގުޅުނު ފަހުން ވަނީ އެ ކްލަބަށް 245 މެޗު ކުޅެދީ 26 ލަނޑު ކާމިޔާބު ކޮށްދީފައެވެ. އޭނާ ވަނީ ރެއާލުގެ ފުރަތަމަ ޓީމުގައި ހޭދަކުރި 9 އަހަރުގައި 16 ތަށި ކާމިޔާބު ކޮށްފައެވެ.
