އިންޑިއާގެ ބޮޑުވަޒީރު ނަރެންދުރަ މޯދީ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަންނަވާ ދެކުނު އޭޝިއާގެ ލީޑަރުންނަށް ނިއު ދިއްލީން ހޫނު މަރުހަބާއެއް ދެންނެވުމަށް ތައްޔާރުވެފައިވާއިރު، ރާއްޖޭގެ ރައީސުލް ޖުމްހޫރިއްޔާގެ ދަތުރުފުޅު އިންޑިޔާގެ ބޮޑެތި ނޫސްތަކުގެ ސަމާލުކަން ހޯއްދަވައިފިއެވެ.
މި ހަރަކާތުން މޯދީގެ ތާރީޚީ ތިންވަނަ ދައުރު ފާހަގަކުރާއިރު، ރާއްޖޭގެ ރައީސް މުހައްމަދު މުއިއްޒުގެ އިތުރުން ގިނަ ގައުމުތަކުގެ އިސްވެރިން ބައިވެރިވެވަޑައިގަންނަވައެވެ.
މިދިޔަ ނޮވެމްބަރު މަހު ރައީސް މުއިއްޒު ވެރިކަމާ ހަވާލުވެވަޑައިގެންނެވި ފަހުން އިންޑިއާ އާއި ރާއްޖެއާ ދެމެދު ވަނީ ނުތަނަވަސްކަން އުފެދިފައެވެ. ކެމްޕެއިންގައި ރައީސް މުއިއްޒު ވަނީ އިންޑިއާއަށް ވަރަށް ބޮޑަށް ފާޑު ވިދާޅުވަމުން، މިހާރު އެ މީހުންގެ ބަދަލުގައި އާންމުން ގެނެސްފައިވާ އިންޑިއާގެ ސިފައިން ބޭރުކުރައްވާނެކަމަށް ވަކާލާތު ކުރައްވައިފައެވެ. މި ގުޅުން ހީނަރުވި ނަމަވެސް އިންޑިއާއިން ވަނީ ރައީސް މުއިއްޒަށް ރަސްމިއްޔާތަށް ދައުވަތު އަރުވާފައެވެ. މި ދައުވަތަށް ރައީސް މުއިއްޒު ޝުކުރު އަދާކުރައްވައި، ދެ ގައުމުގެ ގުޅުން އިތުރަށް ބަދަހި ކުރައްވާނެ ކަމުގެ ޔަގީންކަން ދެއްވިއެވެ.
"މި ދަތުރުފުޅަކީ ރާއްޖެ އާއި އިންޑިއާގެ ގުޅުން ވަރަށް ރަނގަޅު މިސްރާބެއްގަކަން އަންގައިދޭ ދަތުރެއް،" ރަސްމީ ބަޔާނެއެގައި ވެއެވެ.
މިއީ ރައީސް މުއިއްޒު ވެރިކަމާ ހަވާލުވެވަޑައިގަތުމަށްފަހު އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅެވެ.
ހުވާކުރުމަށް ވާންޖެހޭ ތައްޔާރީތައް ވަރުގަދަވަމުން އަންނައިރު، ބޮޑުވަޒީރު މޯދީ އާއި ރައީސް މުއިއްޒު ހިމެނޭ ބޮޑު ބެނާއެއް ވަނީ އިންޑިޔާގެ ފޮރިން މިނިސްޓްރީގެ ބޭރުގައި ބަހައްޓާފައެވެ. އޭޝިއާގެ އެހެން ލީޑަރުންނާ އެކު މޯދީގެ ޕޯސްޓަރުތައްވެސް ދިއްލީގެ އެކި ކަންކޮޅުތަކުގައި އެބަހުޓެވެ. އިންޑިއާގެ "ނެއިބަރހުޑް ފަސްޓް" ސިޔާސަތަށް ބާރުއަޅައި، ހުވާކުރެއްވުމުގެ ރަސްމިއްޔާތުގައި ރާއްޖޭގެ އިތުރުން ބަންގްލަދޭޝް، ސްރީލަންކާ، ބޫޓާން، ނޭޕާލް، މޮރިޝަސް އަދި ސީޝެލްސްގެ ލީޑަރުން ވެސް ބައިވެރިވެވަޑައިގަންނަވާނެ ކަމަށް ބެލެވެއެވެ.
