ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގައި ސަރުކާރުން 37 ބިލެއް ހުށަހަޅަން ނިންމައިފިއެވެ.
މަޖިލީހުގެ ގަވާއިދުގެ 82 ވަނަ މާއްދާގެ ރ ގައި ބުނެފައިވަނީ މަޖިލީހުގެ ކޮންމެ ދައުރެއް ފަށާއިރު، ސަރުކާރުން އެ ދައުރަކަށް ހުށަހަޅަން ޖެހޭ ބިލްތަކުގެ ލިސްޓެއް މަޖިލީހުގެ ރައީސަށް ފޮނުވަން ޖެހޭނެ ކަމަށެވެ.
ރައްޔިތުންގެ މަޖިލީހުގެ މިއަދު ޖަލްސާގައި މަޖިލީހުގެ ރައީސް އަބްދުއްރަހީމް އަބްދުالله ވިދާޅުވީ މިދައުރަށް ސަރުކާރުން ހުށަހަޅަން ޖެހޭ ބިލްތަކުގެ ލިސްޓު ލިބިވަޑައިގެންފައިވާ ކަމަށެވެ.
"މ އެ ލިސްޓުގައި ޖުމްލަ 37 ބިލް ހިމަނުއްވާފައިވޭ. އެ ލިސްޓް އިއްޒަތްތެރި މެންބަރުންނާ މިއަދު ހިއްސާކުރާނަން،" މަޖިލީހުގެ ރައީސް ވިދާޅުވިއެވެ. އަދި މަޖިލީހުގެ ވެބްސައިޓުގައި ވެސް އެ ލިސްޓު ޝާއިއު ކުރާނެ ކަމަށްވެސް ވިދާޅުވިއެވެ.
ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގައި ސަރުކާރުން ވަނީ 24 ބިލެއް ހުށަހަޅައިފައެވެ.
