ދިރިއުޅުމުގެ ލޯތްބަކީ ގައުމީ ޓީމު ކަމަށާއި މާދަމާ ފަށާ ޔޫރޯ ފުޓްބޯޅަ މުބާރާތުގެ ޗެމްޕިއަންކަން ހޯދުމަށް ކެތްމަދުވެފައި ހުރި ކަމަށް ޕޯޗުގަލްގެ މަޝްހޫރު ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ ބުނެފިއެވެ.
"އީއެސްޕީއެން" އަށް ހާއްސަ ބަސްދީގަތުމެއްގައި ވާހަކަ ދައްކަމުން ރޮނާލްޑޯ އިތުރަށް ބުނީ މިފަހަރުގެ ޔޫރޯ ފުޓްބޯޅަ މުބާރާތަކީ އޭނާއަށް ވަރަށް ހާއްސަ މުބާރާތެއް ކަމަށެވެ. ރޮނާލްޑޯ ފުރަތަމަ ގައުމީ ޓީމަށް ކުޅެދިން ބޮޑު މުބާރަކީ 2004 ގެ ޔޫރޯއެވެ. އަމިއްލަ ގައުމުގެ ސަޕޯޓަރުން ކުރިމަތީގައި ރޮނާލްޑޯ މޮޅު ކުޅުމެއް ދައްކައި ސަޕޯޓަރުންގެ ހިތުން ޖާގަ ހޯދީ މިމުބާރާތުންނެވެ. އެއަށްފަހު ފާއިތުވެދިޔަ 20 އަހަރު ތެރޭގައި ރޮނާލްޑޯ ވެގެން ގޮސްފައި ވަނީ ޕޯޗުގަލް ގައުމީ ޓީމުގެ ފަޚްރަށެވެ.
"އަހަރެންގެ އުމުރުން މިހާރު 39. މިއުމުރުގައި ގައުމީ ޓީމުން ޖާގަ ލިބުމަކީ އަގު ނުކުރެވޭނެ ހަދިޔާއެކޭ ބުނެވޭނީ. އަހަންނަށް އެނގޭ ކެރިޔަރުގައި ދެން މާގިނަ ދުވަސްތަކެއް ވަންދެން އަހަންނަށް ނުކުޅެވޭނެކަން. އެކަމަކު ގައުމީ ޖާޒީގައި ކުޅެދެވޭ ކޮންމެ މެޗަކީ ހާއްސަ މެޗެއް. ގައުމީ ޓީމަށް ކުޅެން ލިބޭ ކޮންމެ ފުރުސަތަކީ ހާއްސަ ފުރުސަތެއް. އަހަރެންގެ ދިރިއުޅުމުގެ ލޯތްބަކީ ގައުމި ޓީމް. އަދި ކުރިއަށް އޮތް ޔޫރޯ ކާމިޔާބު ކުރުމަކީ ވަރަށް ބޮޑު ހުވަފެނެއް" ރޮނާލްޑޯ ބުންޏެވެ.
ޔޫރޯގައި ޕޯޗުގަލް ހިމެނެނީ ތުރުކީ އާއި ޖޯޖިއާ އަދި ޗެކްރިޕަބްލިކާއެކު ގްރޫޕް "އެފް" ގައެވެ. ޔޫރޯގައި މިފަހަރު ޕޯޗުގަލް ކުޅޭ ފުރަތަމަ މެޗުގައި އަންނަ އަންގާރަ ދުވަހުގެ ރޭ ރާއްޖޭ ގަޑިން ދަންވަރު 12 ޖަހާއިރު ނިކުންނާނީ ޗެކްރިޕަބްލިކާ ދެކޮޅަށެވެ.
