މާލޭގެ ހެންވޭރު މެހެލިގޯޅީގައި ޕާކުކޮށްފައި ހުރި ސައިކަލްތަކެއްގައި ރޭގެ ވަގުތެއްގައި ރޯކޮއްލައިފިއެވެ.
ސައިކަލުތައްހުރީ ބޭނުންނުކުރެވޭވަރަށް އަނދާފަކަމަށް އެމްއެންޑީއެފް އިން ބުނެއެވެ.
އަލިފާން ނިއްވާލުމުގައި އެމްއެންޑީއެފް ފަޔަރ އެންޑް ރެސްކިޔު ސަރވިސްއިން ހަރަކާތްތެރިވެފައިވެެއެވެ.
މި ހާދިސާގެ ރިޕޯޓް އެމްއެންޑީއެފްއަށް ލިބުނީ 00:37 ހާއިރު ކަމަށާއި ލިބުމާއެކު އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ފަޔަރ ފައިޓަރުން ވަނީ އެ ސަރަހަށްދަށް ގޮސް އަލިފާން ނިއްވުމުގެ މަސައްކަތް ކޮށްފަކަމަށް އެމްއެންޑީއެފްއިން ބުނެއެވެ. އަލިފާން ނިއްވޭވަރު ވީ 00:42 ހާއިރުއެވެ.
މި ހާދިސާގައި ފަސް ސައިކަލެއް ބޭނުން ނުކުރެވޭ ވަރަށް ވަނީ އަނދާފައެވެ. އެއްވެސް މީހަކަށް މި ހާދިސާގައި އަނިޔާ ލިބިފަ ނުވާކަމަށް އެމްއެންޑީއެފްއިން ބުނެއެވެ.
މިމަހުގެ 4 ވަނަދުވަހު މެންދަމުވެސް ޕާކުކޮށްފައި ހުރި ސައިކަލުތަކެއްގައި ރޯކޮށްލި ހަދިސާއެއް ހިނގާފަވެއެވެ. އެ ހާދިސާގައި ތިން ސައިކަލެއް ބޭނުންނުކުރެވޭ ވަރަށް ރޯވެފައިވެއެވެ. މިމައްސަލައިގައި އަލިފާން ރޯކޮށްލިކަމަށް ތުހުމަތުކުރެވޭ މީހާ ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.
