ޖަރުމަނުގައި މިހާރު ކުރިއަށްދާ ޔޫރޯ ފުޓްބޯޅަ މުބާރާތުގެ ގްރޫޕް "އީ" ގައި ރޮމޭނިޔާ 0-2 އިން ރޭ ބަލިކޮށް މަޝްހޫރު ބެލްޖިއަމްއިން ދެވަނަ ބުރުގެ އުއްމީދު ދަމަހައްޓައިފިއެވެ.
ގްރޫޕް ސްޓޭޖުގައި ކުޅުނު ފުރަތަމަ މެޗުގައި ހައިރާން ކުރުވަނިވި ގޮތަކަށް ސްލޮވާކިޔާ އަތުން 1-0 އިން ބަލިވި ބެލްޖިއަމުގެ ދެލަނޑު ރޭ ކާމިޔާބު ކޮށްދިނީ މެޗް ފަށައިގެން ދެވަނަ މިނެޓުގައި ޔޫރީ ޓީލެމަންސް އާއި ދެވަނަ ހާފް ނިމެން ދަނިކޮށް ކެޕްޓަން ކެވިން ޑިބްރޭނާއެވެ.
މިގްރޫޕުގެ ކޮންމެ ޓީމަކަށްވެސް 3 ޕޮއިންޓް ލިބި، ގްރޫޕުގެ ފޯރި ވަނީ ވަރަށް ގަދަވެފައެވެ. މިއީ ޔޫރޯ ފުޓްބޯޅަ މުބާރާތުގެ ދިގު ތާރިހަށް ބަލާއިރުވެސް އެއްގްރޫޕެއްގައި ހިމެނުނު ހަތަރު ޓީމު ޕޮއިންޓުގެ ގޮތުން އެއްވަރުވި ފުރަތަމަ ފަހަރެވެ. މިގްރޫޕުގެ އެއްވަނައިގައި އޮތީ ރޮމޭނިޔާއެވެ. ދެވަނައިގައި ބެލްޖިއަމް އޮތްއިރު ތިންވަނައިގައި އޮތީ ސްލޮވާކިޔާއެވެ. ގްރޫޕް ފުލުގައި އޮތީ ޔޫކްރައިނެވެ. ޔޫކްރައިން ރޭ ވަނީ ފަހަތުން އަރައި ސްލޮވާކިޔާ އަތުން 2-1 އިން މޮޅުވެފައެވެ. އެކަމަކު އެގައުމަށް ގެއްލުން ދެލަނޑު އެބައޮތެވެ.
ގްރޫޕް ސްޓޭޖް ފަހު މެޗުގައި ބެލްޖިއަމް ނިކުންނާނީ ޔޫކްރައިނާ ދެކޮޅަށެވެ. އަދި ސްލޮވާކިޔާ ބައްދަލު ކުރާނީ ރޮމޭނިޔާއާއެވެ.
