މާލޭގައި މީހަކު ރަހީނު ކުރުމަށް ފަހު އެ މީހާގެ އިނގިއްޔެއް ބުރިކުރި މައްސަލާގައި ތުހުމަތުކުރެވޭ ދިވެހި ތިން ފިރިހެނުން، ޝަރީޢަތުގެ މަރުޙަލާ ނިމެންދެން ބަންދުގައި ބޭތިއްބުމަށް ކްރިމިނަލް ކޯޓުން ނިންމައިފިއެވެ.
ތޫނު އެއްޗެއް ބޭނުންކޮށްގެން މާރާމާރީ ހިންގުމާއި، ޖިސްމާނީ އަނިޔާ ދިނުމާއި، ޤާނޫނާ ޚިލާފަށް މީހަކު ބަންދުކުރުމުގެ ތުހުމަތުގައި ހައްޔަރުކުރެވިފައިވަނީ ތ. ތިމަރަފުށްޓަށް ނިސްބަތްވާ 21 އަހަރުގެ ފިރިހެނަކާއި، ރ. ކަނދޮޅުދޫއަށް ނިސްބަތްވާ 23 އަހަރުގެ ފިރިހެނަކާއި، ގދ. ގައްދޫއަށް ނިސްބަތްވާ 18 އަހަރުގެ ފިރިހެނެކެވެ
ކޯޓު އަމުރުގައި ބުނެފައިވަނީ ހައްޔަރުކުރި ތިން މީހުންނަކީ ވެސް އަނިޔާ ލިބުނު މީހާއާ އެއް ތަނެއްގައި މަސައްކަތް ކުރާ މީހުން ކަމަށެވެ،
މި ތިން މީހުން ހައްޔަރުކުރުމަށްފަހު، ފުރަތަމަ ބަންދުގެ މުއްދަތު ކަނޑައެޅުމަށް ޖުލައި 3 ވަނަ ދުވަހު ކްރިމިނަލް ކޯޓަށް ހާޒިރުކުރެވުނެވެ. އެ ދުވަހު ކޯޓުން ވަނީ ތިން މީހުންގެ ބަންދުގެ މުއްދަތު 5 ދުވަހަށް އިތުރުކޮށްފައެވެ. އަދި އެ މުއްދަތު ހަމަވުމާ ގުޅިގެން އިއްޔެ އަލުން ކޯޓަށް ހާޒިރުކުރެވުނު އިރު، ޝަރީޢަތް ނިމެންދެން ބަންދުގައި ބެހެއްޓުމަށް އަމުރުކުރެވުނެވެ.
ކޯޓުގައި ބަޔާން ދެމުން، ތުހުމަތުކުރެވޭ ފަރާތްތަކުން ބުނެފައިވަނީ އަނިޔާ ލިބުނު ފަރާތަކީ އެ މީހުންނާއެކު މަސައްކަތްކުރަމުންދިޔަ މީހެއް ކަމަށެވެ، އަދި އެ ފަރާތް ރަހީނެއް ނުކުރާ ކަމަށާއި، އިނގިލި ބުރި ނުކުރާ ކަމަށާއި، ޕަވަރ ޓޫލް ބޭނުންކުރަމުންދަނިކޮށް އެކްސިޑެންޓަލްކޮށް އަނިޔާވީ ކަމަށް ބުނެ، ކުރެވޭ ތުހުމަތުތަކަށް އިންކާރުކޮށްފައިވެއެވެ.
ނަމަވެސް، އަނިޔާ ލިބުނު ފަރާތުގެ ފޮޓޯތަކަށް ބަލާއިރު، ޖިސްމާނީ އަނިޔާތައް ގަސްދުގައި ދީފައިވާކަމަށް ބެލެވޭ ކަމަށް ފުލުހުން ފާހަގަކޮށްފައިވެއެވެ. މީގެ އިތުރުން، ތަހުގީގީ ބަޔާންތަކާއި ސީސީޓީވީ ފޫޓޭޖްގެ ސްނެޕްޝޮޓްތަކާއި އިންޓެލިޖެންސް ރިޕޯޓާއި އަދި އެ ނޫން ވެސް ހެކި ހުށަހަޅާފައިވާ ކަމަށް ކްރިމިނަލް ކޯޓުގެ އަމުރުގައި ބުނެފައިވެއެވެ.
