މާލެ ސިޓީގައި 26،000 ޓަނުގެ ފެން އުފައްދާ އަދި ރައްކާކުރާ ނިޒާމެއް ޤާއިމުކުރާނެ ކަމަށް މާލޭ ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) ގެ މެނޭޖިންގ ޑިރެކްޓަރ އަބްދުލް މަތީން މުޙައްމަދު އިޢުލާނުކުރައްވައިފިއެވެ.
މިއީ މާލޭ ސިޓީގައި ފެން އުފެއްދުމާއި ރައްކާކުރުން އިތުރުކުރުމަށް ކުންފުނިން ކުރަމުންދާ މަސައްކަތުގެ ތެރެއިން ހިންގާ މަޝްރޫޢެކެވެ.
ޕީއެސްއެމް ނިއުސްގެ ޕްރޮގްރާމެއްގައި ވާހަކަދައްކަވަމުން މަތީން ވިދާޅުވީ، މިހާރު މާލޭގައި ފެން އުފެއްދުމާއި ރައްކާކުރުން ބަލަހައްޓަމުން ގެންދަނީ ބޭނުންކޮށް ހަލާކުވެފައިވާ އަދި މަރާމާތުކޮށްފައިވާ ސިސްޓަމްތަކެއް ކަމަށެވެ. އަދި އެ ސިސްޓަމްތައް ޒަމާނީ ކުރަންޖެހޭކަމަށްވެސް މަތީން ވިދާޅުވިއެވެ. އޭނާ ފެނުގެ ނިޒާމު ފުޅާކުރުމަށް އިތުރު ޖާގައެއްގެ ބޭނުންވާކަންވެސް ފާހަގަކުރެއްވިއެވެ. އަދި ފެން އުފެއްދުމާއި ރައްކާކުރުމުގެ ނިޒާމުގެ ޤާބިލުކަން އިތުރުކުރުމަށް ޚާއްޞަ މަޝްރޫޢުތަކެއް ފަށާފައިވާ ކަމަށް ވިދާޅުވިއެވެ.
ކުންފުނިން އަމާޒު ހިފާފައިވަނީ އަންނަ އަހަރުގެ ތެރޭގައި ފެން އުފެއްދުމުގެ ޤާބިލުކަން 10،000 ޓަނަށް އިތުރުކުރުމަށެވެ. އަދި 26،000 ޓަނަށް ފެން ރައްކާކުރުމުގެ ޤާބިލުކަން އިތުރުކުރުމުގެ މަސައްކަތް އަންނަ މަހު ފެށުމަށް ހަމަޖެހިފައިވާ ކަމަށް ވިދާޅުވިއެވެ.
ކުއްލި ހާލަތެއްގައި ހުޅުމާލެއިން މާލެއަށް އިތުބާރުހުރި ގޮތެއްގައި ފެން ފޯރުކޮށްދިނުމުގެ މުހިންމުކަން މަތީން ފާހަގަކުރެއްވިއެވެ. މަތިން ވިދާޅުވީ، ހުޅުމާލެއާއި މާލެއާ ދެމެދު ގަޑިއިރަކު 800 ޓަނުގެ ފެން ދައުރުކުރެވޭނެ، ފެން ގުޅުވާލުމުގެ ނިޒާމެއް ޤާއިމުކުރުމުގެ މަސައްކަތް އެމްޑަބްލިއުއެސްސީން ކުރަމުންދާކަމަށެވެ.
