ތިލަމާލެ ބްރިޖުގެ 40.47 އިންސައްތަ މަސައްކަތް ނިމިފައިވާ ކަމަށް އިމާރާތްކުރުމާއި ބިނާރާބެހޭ ވުޒާރާގެ ސްޓޭޓް މިނިސްޓަރު އިބްރާހީމް ޠަޢާމު މުޙައްމަދު ވިދާޅުވެއްޖެއެވެ.
ސްޓޭޓް މިނިސްޓަރު އިބްރާހީމް ޠަޢާމު މުޙައްމަދު އެކްސްގައި ކުރެއްވި ޕޯސްޓެއްގައި ވިދާޅުވީ މި މަޝްރޫގެ ދަށުން ބްރިޖުގެ މެރިން ޕްރިކާސްޓް ޑެކް ސެގްމަންޓުގެ ފުރަތަމަ ސެގްމަންޓް މިއަދު ވިލިމާލެ ކައިރިން އަޅާފައިވާ ކަމަށެވެ.
ސްޓޭޓް މިނިސްޓަރ އިތުރަށް ވިދާޅުވީ، ތިލަމާލެ މަޝްރޫއުގެ ޖުމްލަ 40.47 އިންސައްތަ މަސައްކަތް މިހާތަނަށް ނިމިފައިވާ ކަމަށާއި މިދިޔަ އަހަރު ނޮވެމްބަރު މަހު ހިސާބުގައި ނިމިފައި އޮތީ ގާތްގަނޑަކަށް 29 އިންސައްތަ ކަމަށެވެ. ބްރިޖް އަޅަން އެފްކޮންސްއަށް ހަވާލުކޮއްފައިވަނީ އޮގަސްޓް 26، 2021 ގައިއެވެ.
މި މަޝްރޫއު މުޅިން ނިންމާލުމަށް ތާވަލްކޮއްފައިވަނީ 2026 ވަނަ އަހަރުގެ ސެޕްޓްމްބަރ މަހައް ކަމަށް އިމާރާތްކުރުމާއި ބިނާރާބެހޭ ވަޒީރު ޑރ. އަބްދުﷲ މުއްތޮލިބު މީގެކުރިން ވިދާޅުވެފައިވެއެވެ.
ގްރޭޓާމާލޭ ކަނެކްޓިވިޓީ ޕްރޮޖެކްޓުގެ ދަށުން ތަރައްގީ ކުރާ މި ބްރިޖްއަކީ 4 ސަރަހައްދެއް ގުޅުވާލާ، 6.7 ކިލީމީޓަރުގެ ބްރިޖެކެވެ. މިމަޝްރޫއުއަށް 7 ބިލިއަނަށްވުރެ ގިނަ ރުފިޔާ ހޭދަވެއެވެ.
