މ. މުލީގެ ކަރަންޓު މައްސަލަ ޙައްލުކުރުމަށް އައު ޖަނަރޭޓަރެއް އިންސްޓޯލްކުރަން ފަށައިފިކަމަށް ފެނަކަ ކޯޕަރޭޝަންއިން ބުނެފިއެވެ.
ފެނަކަ ކޯޕަރޭޝަނުން ބުނީ މ. މުލީގައި ކަރަންޓު ދިނުމަށް ބެހެއްޓިފައި ހުރި 2 ޖަނަރޭޓަރަށް ދިމާވި މައްސަލައަކާއި ގުޅިގެން މުޅި ރަށުން ކަރަންޓުގެ ޙިދުމަތް ކެނޑިފައިވާކަމަށެވެ.
މައްސަލަ ދިމާވި ވަގުތުން ފެށިގެން ފެނެކައިގެ ޓީމުތަކުން އެ މައްސަލަ ހައްލު ކުރުމުގެ މަސައްކަތް ފަށާފައިވާ ކަމަށްވެސް އެކުންފިނިން ބުނެފައިވެއެވެ. އެގޮތުން 600 ކިލޯވޮޓުގެ އައު ޖަނަރޭޓަރެއް އެރަށަށް ގެންގޮސް، އެ ޖަނަރޭޓަރު އިންސްޓޯލްކޮށްގެން ކަރަންޓު ދިނުމަށް މަސައްކަތްކުރާކަމަށް ފެނަކައިން ބުނެފައިވެއެވެ.
މުލީގައި ދިމާވެފައިވާ ކަރަންޓުގެ މައްސަލައާ ގުޅިގެން އެރަށު ރައްޔިތުންނަށް ދިމާވާނެ އުނދަގޫތަކަށް އެ ކުންފުނިން ވަނީ މަޢާފަށް އެދިފައެވެ.
