ފެންވަރު ރަނގަޅު ބޭސް ބަލްކުކޮށް އެތެރެކުރަން ފެށުމުން، ބޭހުގެ އަގު ތިރިވެ، އާސަންދައިން ބޭހަށް ކުރާ ޚަރަދު ބޮޑުތަނުން ކުޑަވެގެންދާނެ ކަމަށް ހީނާ ވަލީދު ވިދާޅުވެއްޖެއެވެ.
އަދި މި ފިޔަވަޅަކީ ރައީސް ޑރ. މުޙައްމަދު މުޢިއްޒު އެޅުއްވި ހިތްވަރުގަދަ އަދި މުހިންމު ފިޔަވަޅެއް ކަމަށް ހީނާ ވަލީދު ފާހަގަކުރެއްވިއެވެ.
ސަރުކާރުން ޔޫއެންޑީޕީއާ ގުޅިގެން އެސްޓީއޯ މެދުވެރިކޮށް، ޔޫރަޕުގައި ބޭނުންކުރާ ފެންވަރުގެ ބޭސް އެތެރެކޮށް، އަގުތައް ކޮންޓްރޯލްކުރުމުގެ ސިޔާސަތު ތަންފީޒުކުރަން މިހާރު ވަނީ ފަށާފައެވެ.
ހީނާ ވިދާޅުވީ، ސަރުކާރުގެ ސިޔާސަތަކީ ފެންވަރު ރަނގަޅު ބޭސް އަތްފޯރާ އަގުގައި ރައްޔިތުންނަށް ފޯރުކޮށްދިނުން ކަމަށެވެ. އަދި މި ނިޒާމް މިގޮތަށް ބައްޓަންވެގެން ދިޔުމަކީ ދައުލަތަށްވެސް ބޮޑު ލުޔެއް ލިބިގެންދާނެ ކަމެއް ކަމަށް ހީނާ ފާހަގަކުރެއްވިއެވެ. އެގޮތުން، ދައުލަތުން އާސަންދައަށް ކުރާ ޚަރަދުތައް އިތުރުވަމުންދާއިރު، އޭގެ ގާތްގަނޑަކަށް 50 އިންސައްތައަކީ ބޭހަށް ކުރާ ޚަރަދުކަން ފާހަގަކުރައްވައި، ހީނާ ވިދާޅުވީ ބަލްކުކޮށް ބޭސް އެތެރެކުރަން ފެށުމާއެކު، އާސަންދައިން ބޭހަށް ކުރާ ޚަރަދު ވަރަށް ބޮޑުތަނުން ކުޑަކުރެވިގެންދާނެ ކަމަށެވެ.
އެހެންކަމުން، އާސަންދައިގެ ތެރޭގައި ހުރި ލީކޭޖްތައް ކުޑަކުރުމަށް ކުރެވޭ މަސައްކަތަށް ލުއިތަކެއް ލިބި، ދެމެހެއްޓެނިވި ގޮތެއްގައި އާސަންދަ ނިޒާމް ހިންގުމަށް މަގުފަހިވެގެންދާނެ ކަމަށް ހީނާ ވިދާޅުވިއެވެ.
މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން ނެރުނު ނޫސްބަޔާނެއްގައި ހާމަކުރި ގޮތުގައި، ސަރުކާރުން ފަށާފައިވާ އައު ޕްރޮޖެކްޓެއްގެ ދަށުން ޕޫލް ޕްރޮކިއުމަންޓް އުސޫލުން ބޭސް ގަތުމާއި ރާއްޖެ އެތެރެކުރުމުގެ މަސައްކަތް ވަނީ ފެށިފައެވެ.
މި އައު ސިޔާސަތުގެ ދަށުން ރާއްޖެ އެތެރެކުރުމަށް ހުއްދަ ދެވެނީ ދުނިޔޭގެ ޞިއްޙަތު ޖަމްޢިއްޔާ (ޑަބްލިއު.އެޗް.އޯ) ގެ ލިސްޓުގައި ހިމެނޭ ނުވަތަ ޤަބޫލުކުރެވޭ ރެގިއުލޭޓަރީ އޮތޯރިޓީއެއްގައި ރަޖިސްޓަރީކޮށްފައިވާ، އަދި އދ. ގެ ތަރައްޤީއަށް މަސައްކަތްކުރާ ޕްރޮގްރާމް (ޔޫއެންޑީޕީ) އާއި އެމްއެފްޑީއޭގެ ކޮލިޓީ މިންގަނޑުތަކަށް ފެތޭ ބޭސްތަކަށް އެކަނި ކަމަށް އެމްއެފްޑީއޭ އިން ވަނީ ހާމަކޮށްފައެވެ.
މީގެ އިތުރުން، މި ޕްރޮޖެކްޓްގެ ދަށުން ގެނެވޭ ބޭސްތަކަކީ ސީދާ ބޭސް އުފައްދާ ކުންފުނިތަކުން ގަންނަ ބޭސްތަކެއްކަމަށާއި މިކަމުގެ ސަބަބުން ބޭހަށް ކުރާ ޚަރަދު ކުޑަވެ، ބޭހުގެ އަގު ތިރިކުރުމަށް މަގުފަހިވާނެ ކަމަށް އެމްއެފްޑީއޭ އިން ބުނެފައިވެއެވެ.
މި ސިޔާސަތު މިހާރު ތަންފީޒުކުރެވޭނެ ކަމަށް އެމްއެފްޑީއޭއިން ވަނީ ބުނެފައިވާއިއެވެ. އަދި މި ސިޔާސަތު ތަންފީޒު ކުރުމަށް ވަނީ ދެ މަރުޙަލާއަކަށް ބަހާލެވިފައެވެ. މިގޮތުން، ހޯމަ ދުވަހުން ފެށިގެން ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) މެދުވެރިކޮށް ހޯލްސޭލް އަދި ރީޓެއިލް އުސޫލުން ފުރަތަމަ ތަޢާރަފުކުރެވޭ 7 ބާވަތެއްގެ ބޭސް ލިބެން ހުންނާނެއެވެ.
މި އައު ސިޔާސަތު ތަންފީޒު ކުރުމާއެކު، އާސަންދަ ނިޒާމުގެ ތެރޭގައި ހުރި ބޮޑެތި ލީކޭޖްތައް ހުއްޓުވި، ބޭހުގެ އަގު ކޮންޓްރޯލްކުރުމަށް މަގުފަހިވާނެ ކަމަށް އެމްއެފްޑީއޭއިން ބުނެފައިވެއެވެ.
