ކަރާ ހައްދައި ބަލަހައްޓާނެ ގޮތް

ކަރާ ހައްދައި ބަލަހައްޓާނެ ގޮތް:

ޢާންމުކޮށް ކަރާވެޔޮ ގިނަކުރަނީ އޮށްއިންދައިގެންނެވެ. އަދި ކުރިޖަހައިގެނވެސް ކަރާވެޔޮ ގިނަކުރެއެވެ. މުޑުވަކަށް ހޯދާނީ ބަލިނުޖެހި ރަނގަޅަށް ހެދޭ ވެލަކުން ދޮންވެފައިވާ، ބައްޓަން ރަނގަޅު ކަރަލެއްގެ އޮށެވެ. މިގޮތުން އޮށް ނެގުމަށްފަހު ރަނގަޅަށް ދޮވެ ހިޔަލުގައި ބަހައްޓައިގެން ހިއްކައި، އަޅިކޮޅަކާ އެއްކުރާށެވެ. ކުރި އިންދާނަމަ ހޯދާނީ ބަލިނުޖެހި ރަނގަޅަށް ހެދޭ ވެލަކުން 2 ފޫޓް ނުވަތަ 3 ފޫޓް ހުންނަވަރުގެ ކުރިކޮޅެކެވެ.

މުޑުވައްކުރުން

ކަރާވެޔޮ ހެއްދުމަށް ޚިޔާރުކުރާ ބިން ސާފުކުރުމަށްފަހު އަނގަމަތީގައި 2×2 ފޫޓް، ފުންމިނުގައި 1.5 ފޫޓް ހުންނަވަރަށް ވަޅުތަކެއް ތައްޔާރުކުރާށެވެ. ވަޅުތައް ކޮންނައިރު ނެގޭ ކަޅުފަހުން ގަލާއި މޫ ނަގާށެވެ. ކަޅުފަހާއި ކާދު އެއްކުރުމަށްފަހު ކޮނުނު ވަޅުތަކަށް އަޅާށެވެ. ވަޅުގަޑަށް ފަސްއަޅާފައި ހުންނައިރު ވަޅުގަނޑު މުޅިން ނުފުރާ 1 އިންޗި ހާތަން ބަހައްޓާށެވެ. ވަޅުތައް ތައްޔާރުކުރާނީ ކޮންމެ ދެވަޅެއްގެ ދޭތެރޭގައި 5 ފޫޓް ހުންނަވަރަށެވެ. ދެން ފަސްގަނޑު އެއްވަރުކޮށްލުމަށްފަހު ވަޅެއްގައި 8 ނުވަތަ 10 އޮށް އިންދާށެވެ. އޮށްތައް އިންދުމަށްފަހު ދެއިރު ފެންދޭންވާނެއެވެ. ވެޔޮފަޅައިގެން ހެދެމުން އަންނަވަރަކަށް ވަށައިގެން ފަސްގަނޑުޖަހާ ހިސާބަކަށް އަޅިއާއި ކާދު އަޅާ ފަސްގަނޑާ އެއްކުރަމުން ގެންދާށެވެ. އަދި ކުރިތައް ވަޔާނުދާ ވަރަށް ތަންތަންކޮޅުން ވަޅުލަމުން ގެންދާށެވެ. މިގޮތަށް ކުރިވަޅުލާނީ ދެވަޅުގަނޑުގެ ކުރިއައިސް ޖެހެންދެނެވެ. ކަރާވެލުގައި 3-4 ކުރި ބޭންދުމަށްފަހު ފަޅާ ކަފިކުރިތައް ކެނޑުމުން ވެޔޮ ރަނގަޅަށް ހެދޭނެއެވެ. ކަރާވެލުން މާނިކުމެ ކަރާ އަޅަން ފެށުމުން ވެލެއްގައި 5-6 ކަރާ ބޭންދުމަށްފަހު އިތުރަށް ހުރި ކަރާތައް ވެލުން ވަކިކޮށްލުމުން ރަނގަޅުވާނެއެވެ. މިހެން ހެދުމުން ވެލުގައި އަޅާ ކަރާ ބޮޑެތިވެ ލިބޭ ކަރަލުގެ ފެންވަރު ރަނގަޅުވާނެއެވެ.

ވާރޭ ނުވެހޭނަމަ ކޮންމެ ދުވަހަކު ދެއިރު ވެލަށް ފެންދޭންވާނެއެވެ. ކުރިއިންދާނަމަ ފެންދިނުމަށަފަހު ފަންކުރިޖަހާ ހިޔާކުރަންވާނެއެވެ. ކަރާވެޔޮ ފޯދެން ތިން ހަތަރުމަސް ދުވަސް ނަގައެވެ. މޭވާނިކުތުމަށްފަހު 15 ދުވަހާއި 20 ދުވަހާ ދެމެދު ހުންނާނީ ކަނޑާވަރު ވެފައެވެ.

ބަލި އަދި ފަރުވާ

ކަރަލަށް ޢާއްމުކޮށް ޖެހޭ ބައްޔަކީ ހުދު ކޫޑިއާއި، ކަޅުކޫޑި އަދި ރަތްދޫނި އެޅުމެވެ.

• ހުދު ކޫޑިއެޅުމުން ފަތުގެ ދަށްފަރާތުގައި ކަފަފަދަ އެއްޗެއް ހުރުމާއެކު ގުނބޯލަކާ ވައްތަރު ކުޑަދިރޭ އެއްޗެއް އިންނާނެއެވެ.

• ކަޅުކޫޑިއަކީ ކަޅުދިރި ފުއްތަކެއްހެން ފަތުގެ ދަށްފަރާތުގައިވާ ކުދިކުދި ސޫފިތަކެކެވެ.

• ރަތްދޫންޏަކީ ދިގުމިނުގައި 6 މިލިމީޓަރު ހުންނަ މަޑިއަކާ ވައްތަރު، އޮރެންޖު ކުލައިގެ ދޫންޏެކެވެ. މިދޫނި، ވެލުގެ ފަތާއި މާ ކައެވެ. އަދި ދޫނީގެ ބިހުން އުފެދޭފަނި، ވެލުގެ މޫކައެވެ.

މިހުރިހާ ބައްޔަކަށްވެސް ފަނިފަކުސަ މެރުމަށް ބޭނުންކުރާ ބޭހެއް ޖެހުމުން ރަނގަޅުވާނެއެވެ.

މައުލޫމާތު: ދަނޑުވެރިކަމާ ބެހޭ ވުޒާރާ