ކޯމޯ މާލިފުށީގައި, ޓެނިސް ލެޖެންޑު ކަމުގައިވާ ރަފައެލް ނަދާލްގެ އެކަޑެމީއެއް ކަމުގައިވާ "ރަފާ ނަދާލް އެކަޑެމީ" އާ ގުޅިގެން ޕެޑަލް ކޭމްޕެއް ބޭއްވުމަށް ނިންމައިފިއެވެ.
އޮކްޓޯބަރު މަހުގެ 20 ވަނަ ދުވަހުން ފެށިގެން 26 ވަނަ ދުވަހާ ހަމައަށް ކުރިއަށް ގެންދާ މި ޕެޑަލް ކޭމްޕަކީ އެ ރިސޯޓުގައި އަލަށް އިމާރާތް ކުރެވުނު ޕެޑަލް ކޯޓު އިފްތިތާހް ކުރުމަށް ބާއްވާ ކޭމްޕެކެވެ. މި ކޭމްޕުގައި, ރަފާ ނަދާލް އެކަޑެމީގެ ހުނަރުވެރި ކޯޗުންގެ އިރުޝާދުގެ ދަށުން ޕެޑަލް ކުޅުމުގެ ފުރުސަތު ގެސްޓުންނަށް ލިބޭނެއެވެ.
ކޯމޯ މާލިފުށީގައި ބޭއްވުމަށް ގަސްދުކޮށްފައިވާ މި ޕެޑަލް ކޭމްޕާ ބެހޭ ގޮތުން ވާހަކަދައްކަމުން އެ ރިސޯޓުގެ ޖެނެރަލް މެނޭޖަރު ކަމުގައިވާ މުހައްމަދު ސޮބާހް ބުނި ގޮތުގައި މި ކޭމްޕު ރަމްޒުކޮށްދެނީ އެ ރިސޯޓަށް ޒިޔާރަތް ކުރާ ފަރާތްތަކަށް އެކިއެކި ތަފާތު ހަރަކާތްތައް އިންތިޒާމު ކުރުމަށް ޓަކައި އެ ރިސޯޓުގެ މެނޭޖްމަންޓުން އަހައްމިޔަތުކަން ދޭ މިންވަރު ކަމަށެވެ.
"ވަރަށް އުފާ ކުރަން މި ރިސޯޓަށް ޒިޔާރަތްކުރާ ގެސްޓުންނަށް އެންމެ މަތީ ފެންވަރުގެ ކޯޗުންގެ ފަރާތުން ޕެޑަލް ދަސްކުރުމުގެ ފުރުސަތު ފަހިކޮށްދެވޭތީ. މި ކޭމްޕަކީ, މި ރިސޯޓުގެ ގެސްޓުންނަށް އެހެން ތަންތަނުން ނުލިބޭނެ ފަދަ ތަފާތު ފުރުސަތުތައް ލިއްބައިދިނުމަށް ޓަކައި އަޅުގަނޑުމެން ކުރާ މަސައްކަތް ވަރަށް ރަނގަޅަށް ފާހަގަވާނެ ކަމެއް" މި ޕެޑަލް ކޭމްޕާ ބެހޭ ގޮތުން ވާހަކަދައްކަމުން މުހައްމަދު ސޮބާހު ބުންޏެވެ.
ޕެޑަލްއަކީ ޓެނިސް, ބެޑްމިންޓަން އަދި ސްކުއަޝް އެއްކޮށްލައިގެން ކަހަލަ ގޮތަކަށް ރެކެޓެއް ބޭނުންކޮށްގެން ކުޅޭ ކުޅިވަރެކެވެ. ރާއްޖޭގައި އެހާ އާއްމު ކުޅިވަރެއް ނޫނަސް, މެކްސިކޯއިން އުފެއްދި މި ކުޅިވަރަކީ ދުނިޔޭގެ އެކި ކަންކޮޅުގައި ވަރަށް ފޯރިއާއެކު ކުޅެމުން އަންނަ ކުޅިވަރެކެވެ.
