އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު މިއަދު ރަސްމީ ދަތުރުފުޅެއްގައި އައްޑޫ ސިޓީއަށް ވަޑައިގެންފިއެވެ.
ޑރ. ޖައިޝަންކަރު އައްޑޫ އިންޓަނޭޝަނަލް އެއަރޕޯޓަށް ޖައްސަވާލެއްވުމުން، ދިވެހިރާއްޖޭގެ ޚާރިޖީ ވަޒީރު މޫސާ ޒަމީރު މަރުހަބާދެންނެވިއެވެ. ޚާރިޖީ ވަޒީރުގެ އިތުރުން އައްޑޫ ސިޓީގެ މޭޔަރު އަލީ ނިޒާރު، އަދި ސަރުކާރާއި އައްޑޫ ސިޓީ ކައުންސިލްގެ އިސް ބޭފުޅުންވެސް ޑރ. ޖައިޝަންކަރަށް މަރުޙަބާ ދެންނެވުމަށް ވަޑައިގެންނެވިއެވެ.
ޚާރިޖީ ވުޒާރާއިން ހާމަކުރި ގޮތުގައި މި ދަތުރުފުޅުގެ މައިގަނޑު މަޤްޞަދަކީ އިންޑިއާ ސަރުކާރުގެ އެހީތެރިކަމާއެކު އައްޑޫ ސިޓީގައި ކުރިއަށް ގެންދެވުނު މުހިންމު ތަރައްޤީގެ މަޝްރޫޢުތަކެއް ރަސްމީކޮށް އިފްތިތާޙުކުރެއްވުމެވެ. މި ގޮތުން ތިން މައިގަނޑު މަޝްރޫޢެއް ނިމުމަކަށް ގެނެވި، ރަސްމީކޮށް ހުޅުވުމަށް ވަނީ ހަމަޖެހިފައެވެ.
އޭގެ ތެރޭގައި އައްޑޫ ސިޓީގެ ބިން ހިއްކުމުގެ މަޝްރޫޢުއާ، ގޮނޑުދޮށް ހިމާޔަތްކުރުމުގެ މަސައްކަތާއި ގައުކެނޑި އާއި މަރަދޫ ގުޅުވާލުމަށް އިންޑިއާގެ އެފްކޮންސް ކުންފުނިން ޢިމާރާތްކޮށްފައިވާ ހަންކެޑެ ޑިޓުއަރ ލިންކް ހިމެނެއެވެ. މި މަޝްރޫޢުތައް ނިންމާ، ރަސްމީކޮށް ސަރުކާރާ ޙަވާލުކުރުމުގެ ރަސްމިއްޔާތު ބޭއްވުމަށް ވެސް ވަނީ ހަމަޖެހިފައެވެ.
އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ދަނީ ރާއްޖެއަށް ރަސްމީ ދަތުރުފުޅެއްގައި ވަޑައިގެން އެކިއެކި މަސައްކަތްތައް އިފްތިތާހުކުރަމުންނެވެ. ޑރ. ސުބްރަމާނިއަމް ރައީސް މުއިއްޒުއާވެސް ބައްދަލުކުރައްވާފައިވެއެވެ.
ޑރ. ސުބްރަމާނިއަމް ދިވެހިރާއްޖެއަށް ކުރައްވަމުން ގެންދަވާ ރަސްމީ ދަތުރުފުޅުގެ ސަބަބުން ދެ ޤައުމުގެ ދެމެދުގައި ޒަމާނުއްސުރެ އޮންނަ ގުޅުން އިތުރަށް ބަދަހިވެގެންދާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވެއެވެ.
