ރަނގަޅު މޭވާތައް ކެއުމަކީ ހަމުގެ ރީތިކަމަށް ވަރަށް ހެޔޮ ބަދަލެއް ގެނެސްދޭ ކަމެކެވެ. މިގޮތުން ހަމަށް ދުޅަހެޔޮ އަދި އުޖާލާކަމެއް އެކިއެކި މޭވާއިން ގެނެސްދެއެވެ.
ހަމަށް އުޖާލާކަން ގެނެސްދޭ އެންމެ މުހިންމު މޭވާތަކުގެ ތެރޭގައި ފަޅޯ ހިމެނެއެވެ. ރާއްޖެ ފަދަ ހޫނު ސަރަހައްދުތަކުގައި ހެދޭ މި މޭވާގައި 'ޕަޕައިން' ފަދަ އެންޒައިމްތައް ގިނައިން އެކުލެވިގެންވެއެވެ. މި އެންޒައިމްތަކަކީ ގުދުރަތީ ގޮތުން ހަމުގެ މަތީ ފަށަލައިގައިވާ މަރުވެފައިވާ ސެލްތައް ނައްތާލުމަށް އެހީތެރިވެދޭ އެއްޗެކެވެ. މީގެ އިތުރުން ފަޅޮލުގައި ވިޓަމިން އޭ، ސީ އަދި އީ ގިނައިން އެކުލެވިގެންވެއެވެ. މި ވިޓަމިންތަކަކީ ދުޅަހެޔޮ އަދި އެުޖާލާކަންމަތީ ހަން ބެހެއްޓުމަށް ވަރަށް މުހިންމު ވިޓަމިންތަކެކެވެ.
ބެރީގެ ބާވަތްތައް، މިސާލަކަށް ބްލޫބެރީ އަދި ސްޓްރޯބެރީ ފަދަ މޭވާތަކަކީވެސް ވަރަށް ރަނގަޅު ޚިޔާރެކެވެ. މި ކުދި މޭވާތަކުގައި 'އެންތޯސަޔަނިން' އަދި 'ފްލެވަނޮއިޑް' ފަދަ އެންޓިއޮކްސިޑެންޓްތައް ގިނައިން އެކުލެވިގެންވެއެވެ. މި އެންޓިއޮކްސިޑެންޓްތަކަކީ ހަމުގައި އޮކްސިޑޭޓިވް ސްޓްރެސް އުފެދުމުން ހަން ރައްކާތެރިކޮށްދޭ އެއްޗެކެވެ. ފްރީ ރެޑިކަލްސްއާ ދެކޮޅަށް މަސައްކަތްކުރުމުގެ ސަބަބުން މި އެންޓިއޮކްސިޑެންޓްތަކަކީ ހަމުގައި ދުވަސްވުމުގެ ނިޝާންތައް މަދުކޮށް، ޒުވާން އަދި ތާޒާކަންމަތީ ދެމެހެއްޓުމަށް އެހީތެރިވެދޭ އެއްޗެކެވެ.
ކިވީ ވެސް ހިމެނެނީ ނޫރާނީ ހަމެއް ބޭނުންވާ މީހުންގެ ކާނާގެ ތެރޭގައި ހިމަނަން ވަރަށް ރަނގަޅު މޭވާއެއްގެ ގޮތުގައެވެ. ވިޓަމިން ސީ އާއި އީ އިން މުއްސަނދި ކިވީއަކީ ހަމުގެ ޓެކްސްޗަރއަށް ކޮންމެހެން ބޭނުންވާ ކޮލެޖަން އުފެއްދުމަށް އެހީވެދޭ މޭވާއެކެވެ. ގަވައިދުން ކިވީ ކެއުމުން ހަމުގެ ފެންވަރާއި ހަރުދަނާކަން ރަނގަޅުވެ، ޒުވާން މޫނެއް ލިބިގެންދާނެއެވެ.
މޭބިސްކަދުރުގައި ވެސް ހަމުގެ ފައިދާތަކެއް ވެއެވެ. އެއީ އޭގެ އެންޓި އިންފްލެމެޓޮރީ ސިފަތަކުގެ ސަބަބުންނެވެ. މި ސިފަތަކުން ހަމުގެ ރަތްކަން ކުޑަކޮށް، ހިރުވުން ފަދަ ކަންކަން މަޑުކޮށްދެއެވެ. ސްނެކެއްގެ ގޮތުގައި ނުވަތަ ސަލަޑަށް އަޅައިގެން ކައިގެން ވެސް މޭބިސްކަދުރަކީ ހަމުގެ ދުޅަހެޔޮކަން އިތުރުކުރުމަށް ރަނގަޅު ގޮތެކެވެ.
ކަރާއަކީ ހަމައެކަނި ހޫނުމޫސުމުގައި ފިނިކަން ގެނެސްދޭ އެއްޗެއް ނޫނެވެ. އެއީ ވަރަށް ބޮޑަށް ހަށިގަނޑަށް ފެން ފޯރުކޮށްދޭ އަދި ހަމުގެ ސިއްޙަތަށް ވަރަށް ފައިދާ ހުރި އެއްޗެކެވެ. ކަރާގައި ލައިކޮޕީން އެކުލެވެއެވެ. މިއީ އިރުގެ އަލިން ރައްކާތެރިވުމަށާއި އަދި އަލްޓްރާ ވައިލެޓް ގެ ސަބަބުން ލިބޭ ގެއްލުން ހުއްޓުވުމަށް މަދަދުވެރިވާ ވަރުގަދަ އެންޓިއޮކްސިޑެންޓެކެވެ. ހަމައަށް ފެން ފޯރުކޮށްދީ އަދި ރައްކާތެރިކަން ދިނުމުގެ ސަބަބުން، ކަރައިން ހަމުގެ އުޖާލާކަން ދެމެހެއްޓުމަށް އެހީތެރިވެދެއެވެ.
މި މޭވާތައް ކެއުމުގެ އާދަތަކުގެ ތެރެއަށް ވެއްދުމަކީ ދުޅަހެޔޮ އަދި ދިރުންތެރި ހަމެއް ހޯދައި ދެމެހެއްޓުމަށް ޤުދުރަތީ އަދި ރަހަ މީރު ގޮތެކެވެ.
