މެރިޓައިމް ދާއިރާއިން ރާއްޖެއަށް ލިބޭ މަންފަޢަތަކުގެ ބޭނުން އަދި މިހާތަނަށް އެއްވެސް ސަރުކާރަކަށް ހޯދާ ދެވިފައި ނެތްކަމަށް މޯލްޑީވްސް ޕޯރޓްސް ލިމިޓެޑް (އެމްޕީއެލް) ގެ ސީއީއޯ މުޙައްމަދު ވަޖީހް ވިދާޅުވެއްޖެއެވެ.
ސޯޝަލް މީޑިއާގައި ކުރި ޕޯސްޓެއްގައި ސީއީއޯ ވިދާޅުވީ، ގުޅިލެވިފައިވާ ދުނިޔެ އެއްގައި، ރާއްޖެ އުފެދިފައި މިވަނީ، މެރިޓައިމް ދާއިރާއިން ބޮޑެތި ނަފާ ތަކެއް ގައުމަށް ހޯދާ ދެވިދާނެ ފަދަ މުހިންމު ލޮކޭޝަނެއްގައި ކަން އެންމެންވެސް ގަބޫކު ކުރެވޭ ކަމަށެވެ. ނަމަވެސް ހިތާމަޔަކީ މިބޮޑު މަންފަޢަ މިހާތަނަށް އެއްވެސް ސަރުކާރަކަށް ގައުމަށް ހޯދާ ދެވިފައި ނެތްކަމަށް ސީއީއޯ ފާހަގަކުރިއެވެ.
އަނަރޫފަ ވެފައިވާ ރާއްޖޭގެ އިގުތިސާދު، ދިރުވައި ކޮޅަށް ޖެއްސެވުމަށްޓަކައި، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ވެރިކަން ފެށްޓެވުމާއެކު އެމަނިކުފާނު ފެށްޓެވި މަސައްކަތްޕުޅު ތަކުގެ ތެރޭގައި ހިމެނޭ މުހިންމު އެއްކަމަކީ ރާއްޖޭގެ މެރިޓައިމް ދާއިރާއިން ދެވޭ ޚިދުމަތްތައް ފުޅާ ކުރައްވައި އިގުތިސާދީ ގޮތުން ގައުމަށް ބޮޑު މަންފަޢަތަކެއް މިދާއިރާއިން ހޯއްދަވާ ދެއްވުމުގެ މަސައްކަތްތައް ކަމަށްވެސް ސީއީއޯ ވަޖީހް ވިދާޅުވިއެވެ.
އެގޮތުން އެމްޕީއެލް އިން ލައުންޗް ކޮށްފައިވާ “އުތުރު މެރިޓައިމް ސާވިސަސް (ums.mv) " ވެބުސައިޓަކީ، ރާއްޖޭގެ އުތުރުގައި ހިންގުމަށް ތައްޔާރު ވަމުންދާ މެރިޓައިމް ޚިދުމަތްތަކާއި ބެހޭ މައުލޫމާތު ސާފު ކޮށްދޭ ވެބު ސައިޓެކެވެ. އަދި މި ޚިދުމަތް ތައް ފުޅާ ވަމުންދާ ވަރަކަށް، އެމައުލޫމާތު ތައް ވެބުސައިޓު ގައި އަޕްޑޭޓު ކުރެވެމުން ގެންދެވޭނެކަމަށް ސީއީއޯ ވިދާޅުވިއެވެ.
ސީއީއޯ ވަޖީހް ވިދޯޅުވި ގޮތުގައި އިހަވަން ދިއްޕޮޅުގެ ރަށްތަކާއި ވަރަށް ކައިރިން، ކޮންމެ 24 ގަޑި އިރެެއްގެ ތެރޭ ދުނިޔޭގެ އެކި ގައުމު ތަކުގެ 250 ވަރަކަށް ބޮޑެތި ކާގޯ ބޯޓު ދަތުރު ކުރަމުންދެއެވެ. އެހެންކަމުން އެމްޕީއެލްގެ އަމާޒަކީ އެ މިބޯޓު ތަކަށް ބޭނުންވާ އެކި އެކި ޚިދުމަތްތައް ފޯރު ކޮށްދޭނެ އިންތިޒާމް ތައް ހަމަ ޖެއްސައި ދިނުންކަމަށް ސީއީއޯ ވަޖީހް ވިދާޅުވިއެވެ.
މީގެ އިތުރުން، ދުނިޔޭގެ އެހެން ގައުމުތަކުންވެސް ކާގޯ ބޯޓު ފަހަރަށް ފޯރު ކޮށްދޭ މިފަދަ ޚިދުމަތްތަކުގެ ތެރޭ ހިމެނޭ އެންމެ މުހިންމު 14 ޚިދުމަތް، ފޯރު ކޮށް ދިނުމަށްޓަކައި އެމްޕީއެލްއިން ދަނީ ތައްޔާރު ވަމުންނެވެ. އެކަންތައްތަކުގެ މައުލޫމާތު ޔޫއެމްއެސް ވެބުސައިޓގައި ހިމެނިފައިވާނެކަމަށް މުޙައްމަދު ވަޖީހް ވިދާޅުވިއެވެ. މީގެ ތެރެއިން ތެލުގެ ޚިދުމަތް ފިޔަވައި އެހެން ހުރިހާ ޚިދުމަތްތަކެއް ފޯރު ކޮށްދޭނީ އެމްޕީއެލް އިންނެވެ. ތެލުގެ ޚިދުމަތް ފޯރު ކޮށްދޭނީ އެސްޓީއޯ އިންނެވެ.
"އަޅުގަޑުމެންގެ އަމާޒަކީ، މިއީ އިންޓަރނޭޝަލަލް މާކެޓަށް ދެވޭ ޚިދުމަތް ތަކަކަށް ވާއިރު، ކޮމްޕެޓިޓިވު މާކެޓެއްގެ ތެރެއިން، އެޓުރެކްޓިވް ޚިދުމަތް ތަކެއް ފޯރު ކޮށްދީ، ރަނގަޅު މާކެޓް ޝެއާރ އެއް ރާއްޖެ އަށް ހޯދުމެވެ" ވަޖީހް ވިދާޅުވިއެވެ. މި ޚިދުމަތްތަކާއި ބެހޭ މައުލޫމާތު، އެމްޕޕީއެލް ގެ ޔޫއެމްއެސް ވެބުސައިޓުން މިހާރު ލިބިވަޑައި ގަންނަވާނެއެވެ.
އިރާދަ ކުރެއްވިއްޔާ، މެރިޓައިމް ދާއިރާ އިން، މިފެށޭ ޚިދުމަތް ތަކުން، ކައިރި މުސްތަގުބަލެއްގެ ތެރޭ، އަޅުގަޑުމެންގެ ގައުމަށް، ގައުމުގެ އިގުތިސާދަށް ހެޔޮ މަންފަޢަ ތަކެއް ކުރަން ފަށާނެކަމަށް ސީއީއޯ ވިދާޅުވިއެވެ. އަދި މިއީ 24 ގަޑި އިރުގެ އޮޕަރޭޝަނަކަށް ވާއިރު، މިޚިދުމަތް ދޭނެ މުވައްޒަފުން މިކަމަށް އަހުލުވެރިކުރުވައި، މިކަމަށް ބެއިނުންވާ ވަސީލަތްތައް ގާއިމް ކުރުމުގެ މަސައްކަތް ކުރަމުންދާކަމަށްވެސް ސީއީއޯ ފާހަގަކުރެއްވިއެވެ.
އިހަވަންދިއްޕޮޅުގައި ތައާރަފްކުރާ ބައިނަލްއަގުވާމީ ބަންކަރިންގެ ހިދުމަތަކީ އެސްޓީއޯ އާއި އެމްޕީއެލް ގުޅިގެން ފަށާ ހިދުމަތްތަކެކެވެ. މި ހިދުމަތަތައް މި މަހު 12 ގައި ފަށަނެކަމަށް އެމްޕީއެލްއިން ވަނީ ހާމަކޮށްފައެވެ.
