ތިލަމާލޭ ބްރިޖް ކަނޑައެޅިފައިވާ މުއްދަތުގައި ނިންމުމާ ގުޅޭގޮތުން އިންޑިއާގެ އިސްވެރިންނާއެކު، އިމާރާތްކުރުމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބް މަޝްވަރާކުރައްވައިފިއެވެ.
މި މަޝްވަރާތައް ބާއްވާފައިވަނީ ވަޒީރު މުއްޠަލިބް އިންޑިއާގެ މުންބާއީއަށް ކުރައްވާ ރަސްމީ ދަތުރުފުޅުގައި، ގްރޭޓަރ މާލެ ކަނެކްޓިވިޓީ، މާލެ-ތިލަފުށި ލިންކް ޕްރޮޖެކްޓްގެ 12 ވަނަ ޖޮއިންޓް ޕްރޮޖެކްޓް މޮނިޓަރިންގ ކޮމިޓީގެ ބައްދަލުވުމުގެ ތަރެއިންނެވެ.
މި ބައްދަލުވުމުގެ މަޤްޞަދަކީ ޕްރޮޖެކްޓް ކަނޑައެޅިފައިވާ މުއްދަތުގައި ނިންމުމަށްޓަކައި ވުޒާރާތަކާއި އެހެނިހެން ސްޓޭކްހޯލްޑަރުންގެ އެންމެ އިސް ފަންތީގެ ބޭފުޅުންގެ ޝާމިލްވުމާއެކު ކަނޑައެޅިފަިވާ މުއްދަތަށް މަސައްކަތް ނިންމޭނެކަން ކަށަވަރު ކުރުންކަމަށް އިމާރާތްކުރުމާއި ބިނާރާ ބެހޭ ވުޒާރާއިން ހާމަކުރިއެވެ.
މީގެ އިތުރުން، މި ބައްދަލުވުމުގައި، ޕްރޮޖެކްޓް ކުރިއަށްދާ މިންވަރު ބެލުމަށްޓަކައި ސްޓްރެޓެޖިކް އަދި ޓެކްނިކަލް މަޝްވަރާތައްވެސް ކުރެވުނެވެ.
އިމާރާތްކުރުމާއި ބިނާރާ ބެހޭ ވުޒާރާއިން ވިދާޅުވީ މިހާތަނަށް ޕްރޮޖެކްޓްގެ 43.59 އިންސައްތަ މަސައްކަތް ނިމިފައިވާކަމަށެވެ. އެ އިދާރާއިން މަޢުލޫމާތުދޭ ގޮތުގައި މާލެއިން ގުޅީފަޅާ ހަމައަށް މަސައްކަތް ނިމޭނެ ކަމަށް ލަފާކުރެވެނީ 2026 ވަނަ އަހަރުގެ މާރިޗު 31 ވަނަ ދުވަހުއެވެ. އަދި ގުޅީފަޅުން ތިލަފުށްޓާ ހަމައަށް މަސައްކަތް ނިމޭނެ ކަމަށް ލަފާކުރެވެނީ 2026 ވަނަ އަހަރުގެ ސެޕްޓެންބަރު 30 ވަނަ ދުވަހުއެވެ.
މި ބައްދަލުވުމުގައި ޑރ. މުއްޠަލިބާއެކު ދިވެހިރާއްޖެއަށް ކަނޑައަޅުއްވާފައިވާ އިންޑިއާގެ ހައި ކޮމިޝަނަރު މުނު މަހާވަރު ވެސް ބައިވެރިވެވަޑައިގެންނެވިއެވެ. މީގެ އިތުރުން، ސްޓޭޓް މިނިސްޓަރުން އިބްރާހީމް ތާޢާމް މުޙައްމަދު އަދި އިސްމާޢީލް ޙަމީދު، އަދި އިމާރާތްކުރުމާއި ބިނާރާ ބެހޭ ވުޒާރާގެ ޓެކްނިކަލް ޓީމާއި މާލީ ވުޒާރާ އަދި ޚާރިޖީ ވުޒާރާގެ އިސް ބޭފުޅުން ބައިވެރިވެވަޑައިގެންނެވިއެވެ.
އިންޑިއާގެ ފަރާތުން މި ބައްދަލުވުމުގައި އެޤައުމުގެ އެކްސްޓާނަލް އެފެއާޒްއާއި އެ ޤައުމުގެ އެގްޒިމް ބޭންކުގެ އިސްވެރިނާއި ބްރިޖު މަޝްރޫއުގެ ކޮންޓްރެކްޓަރާއި ކޮންސަލްޓަންޓުން ބައިވެރިވިއެވެ.
