މިސްކިތެއް ޤާނޫނާ ޚިލާފަށް ބިނާކޮށްފައިވާ ކަމަށް ބުނެ މިސްކިތް ތަޅާލުމަށްފަހު ހަރުކަށި ހިންދޫ ޖަމާޢަތްތަކުން ކުރަމުންދާ އިހުތިޖާޖުތައް ދެމިގެންދާތީ އިންޑިއާގެ ޝިމްލާގައި ހަލަބޮލިކަން އިތުރުވެއްޖެއެވެ.
ހޮނިހިރު ދުވަހު މަންދީގައި އިހުތިޖާޖުތައް ފެށުނެވެ. އެތައް ސަތޭކަ ބަޔަކު އެއްވެ، ޕަބްލިކް ވަރކްސް ޑިޕާޓްމަންޓް (ޕީ.ޑަބްލިއު.ޑީ) ގެ ބިމުގައި ބައެއްގައި އިމާރާތްކޮށްފައިވާ މިސްކިތެއް ނައްތާލުމަށް ގޮވާލައިފާވެއެވެ. އަދި ހަލަބޮލިކަން ކޮންޓްރޯލްކުރުމަށް ފުލުހުން ވޯޓަރ ކެނަންއާއި ކަރުނަ ގޭސް ބޭނުންކޮއްފައިވެއެވެ. އަދި ބޮޑެތި އެއްވުންތައް ހުއްޓުވުމަށް އަމުރުތަކެއް ފުލުހުން ނެރެފައިވެއެވެ. އިހުތިޖާޖުކުރި މީހުން ހިންދޫ ލަވަތައް ކިޔަމުން މިސްކިތާ ކައިރީގައި ހުރި ފުލުހުންގެ ބެރިކޭޑްތައް ފަޅާލަން މަސައްކަތްކުރުމުން ހާލަތު އިތުރަށް ގޯސްވެގެންދިޔައެވެ. މި އިހުތިޖާޖު ވެގެންދިޔައީ ޝިމްލާގެ ސަންޖައުލީ ސަރަހައްދުގައި އެހެން މިސްކިތަކާ ގުޅިގެން ހިނގި އަނިޔާވެރި އިހުތިޖާޖުތަކާ އެއްފަދަ ކަމަކަށެވެ.
މަންދީގައި ކަންތައްތައް ގޯސްވީ ލޯކަލް ކޯޓަކުން މިސްކިތުގެ ޤާނޫނާ ޚިލާފު ކަމަށް ބުނާ ބައިތައް ތަޅާލުމަށް އަަމުރުކުރުމުންނެވެ. މިސްކިތް ކޮމިޓީން ވިދާޅުވި ގޮތުގައި ޚިލާފު އުފެދިފައިވާ ބައި ތަޅާލަން ފަށާފައިވީ ނަމަވެސް އިހުތިޖާޖުތައް ހުއްޓާލާފައެއް ނުވެއެވެ. މަޑުމައިތިރިކަން ދެމެހެއްޓުމަށް 700 އަށްވުރެ ގިނަ ފުލުހުން ވަނީ އެ ސަރަހައްދުގައި ޑިޕްލޯއި ކޮށްފައެވެ.
އިހުތިޖާޖުތައް ކުރިއަށްދާއިރު، ބީޖޭޕީގެ ތަރުޖަމާނު ޗެޓަން ބްރަގްޓާ ފަދަ ސިޔާސީ ފަރާތްތަކުން ސަރުކާރުން މި މައްސަލަ ބަލަހައްޓާ ގޮތާމެދު ފާޑުކިޔާފައިވެއެވެ. އެހެންނަމަވެސް މުސްލިމު މުޖުތަމަޢުން ވަނީ ޤާނޫނީ ގޮތުން ކަންކަން ކުރިއަށް ގެންދިއުމަށް އެއްބަސްވެފައެވެ.
