އޮޕަރޭޝަން ކުރަނގި މިހާތަނަށް ދެ ރަށެއްގައި ކާމިޔާބުކަމާއެކު ނިމުމަކަށް އައިސްފައިވާކަން ދާޚިލީ ސަލާމަތާއި ފަންނިއްޔަތާ ބެހޭ ވުޒާރާއިން އިޢުލާނުކޮށްފިއެވެ.
އެގޮތުން، ހއ. މުރައިދޫ އަދި ހއ. މޮޅަދޫގައި އޮޕަރޭޝަން ކުރަނގި ކާމިޔާބުކަމާއެކު ނިންމާލެވިފައިވާކަމަށް އެ ވުޒާރާއިން ފާހަގަކުރެއެވެ.
އޮޕަރޭޝަން ކުރަންގި އަކީ ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މަޢުލޫމާތު އެއްކުރުމަށް ސަރުކާރުން 30 ޖުލައި ގައި ފެށި މަސައްކަތެކެވެ. މި މަސައްކަތުގެ ފުރަތަމަ ފިޔަވަހި ހިންގުނީ ކ. ހިންމަފުށި އަދި ކ. މާފުށީގައެވެ. އަދި މިހާރު ދެވަނަ ފިޔަވަހި ވަނީ މުޅި ރާއްޖެއަށް ފުޅާކުރެވިފައެވެ.
ދާޚިލީ ސަލާމަތާއި ފަންނިއްޔަތާ ބެހޭ ވުޒާރާއިން ވަނީ ރަށްރަށުގެ ހުރިހާ ކައުންސިލްތަކަށް އޮންލައިން ޕޯޓަލްއަށް އެކްސެސް ދީފައެވެ. މިއީ ރަށްރަށުގައި ތިބި ބިދޭސީންގެ ބަޔޯމެޓްރިކްސް އެއްކުރުމުގެ މަސައްކަތް ފެށުމަށްޓަކައެވެ. އަދި ބިދޭސީން ދެނެގަތުމަށް ޚާއްޞަ އެޕްލިކޭޝަނެއް ހިމެނޭ ފިންގަރޕްރިންޓް މެޝިންތަކެއްވެސް ވަނީ ކައުންސިލްތަކަށް ދޫކުރެވިފައެވެ.
މި އެޕްލިކޭޝަނުން ގަވާއިދާ ޚިލާފަށް އުޅޭ ބިދޭސީންކަމަށް ޝައްކުކުރެވޭ މީހުންގެ ފޮޓޯ އަޕްލޯޑްކޮށް، އެމީހުންގެ ކާކުކަން އަންގައިދޭ މަޢުލޫމާތާއި، ރާއްޖެ އައިސްފައިވާ ބޭނުމާއި، މަސައްކަތްކުރާ ކުންފުނީގެ މަޢުލޫމާތު ހިއްސާކުރެވޭނެއެވެ.
ސަރުކާރުގެ އަމާޒަކީ 3 އަހަރުގެ ތެރޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމެވެ.
