ޗައިނާއަށް ފިއްތުންތައް ކުރިމަތި ކުރުމަށްޓަކައި ޓައިވާނަކީ އެމެރިކާއަށް މުހިންމު ސަރަހައްދެކެވެ. އެމެރިކާއިން ވަނީ ޓައިވާން ދިފާއު ކޮށްދޭނެ ކަމަށް ބުނާ ވާހަކަ މި ހަފްތާގައިވެސް ތަކުރާރުކޮށްފައެވެ. ޕެސިފިކްއާއި ކެރިބިންގެ އެންމެ ކުދި އަދި އެންމެ ފަޤީރު ޤައުމުތަކުން ވަނީ، ޓައިވާނަށް އދގެ ގޮނޑިއެއް ހޯދައި ދިނުމަށް ސެކްރެޓަރީ ޖެނެރަލް އެންތޯނިއޯ ގުޓެރެސްއަށް މި ހަފްތާގައި ސިޓީއެއް ވެސް ފޮނުވާފައެވެ.
ދެކުނު ޗައިނާ ކަނޑާއި އިރުމަތީ ޗައިނާ ކަނޑުގެ މަސްރަޙު ހޫނުވަމުން ދިއުމާއެކު ޗައިނާގެ ކޮންމެ ހަމަލައަކުން ޓައިވާން ދިފާޢުކޮށްދޭނެ ކަމުގެ ޔަގީންކަން އެމެރިކާއިން އަލުން ކަށަވަރު ކޮށްދިނީ އަހަރަކު އެއްފަހަރު ބާއްވާ އެމެރިކާ-ޓައިވާން ޑިފެންސް އިންޑަސްޓްރީ ކޮންފަރެންސްގައެވެ.
އެމެރިކާ-ޓައިވާން ބިޒްނަސް ކައުންސިލް (ޔޫއެސްޓީބީސީ) އިން އިންތިޒާމްކޮށްގެން ބާއްވާ މި ކޮންފަރެންސް ކުރިއަށް ގެންދަނީ އަމިއްލަ ވެރިކަމެއް ކުރާ ޖަޒީރާއަކީ ބާޣީ ޕްރޮވިންސެއްގެ ގޮތުގައި ދެކިގެން ޗައިނާއިން ފިޔަވަޅުތައް އަޅަމުންދާ ދަނޑިވަޅެއްގައެވެ.
ޓައިވާނާ އެމެރިކާގެ ގުޅުމާ ބެހޭ ޤާނޫނާ ހަވާލާ ދީ އެމެރިކާގެ ސްޓޭޓް ޑިޕާޓްމަންޓުން ބުނެފައިވަނީ ޓައިވާން ކަނޑު އޮޅި ހުރަސްކޮށް ސުލްހައާއި ހަމަޖެހުން ދެމެހެއްޓުމަށްޓަކައި ޓައިވާންގެ ދިފާއީ ކަންކަން ކަށަވަރުކުރުމަކީ އެމެރިކާއަށް ވަރަށް މުހިންމު ކަމެއް ކަމަށެވެ.
ޓައިވާނަކީ ބާޣީ ޕްރޮވިންސެއް ކަމަށް ބުނެ ޗައިނާއިން ތަކުރާރުކޮށް އިއުތިރާޒު ކޮށްފައި ވެއެވެ. ނަމަވެސް އެމެރިކާއިން ބުނަނީ ޓައިވާނަށް ހަތިޔާރު ވިއްކުމަކީ ބެއިޖިންގެ ޕްރެޝަރާ ހެދި ކުރާ ކަމެއް ނޫން ކަމަށެވެ. ނަމަވެސް އެއީ، ޓައިވާންގެ ގުޅުންތަކާ ބެހޭ ގާނޫނާއި އެމެރިކާގެ އެހެން ގާނޫނުތަކުން އެމެރިކާއިން ކުރުމަށް ސަރުކާރަށް މަގުދައްކާ ކަމެއް ކަމަށެވެ. އަދި އެމެރިކާއިން ބުނަނީ އެމެރިކާއިން ގެންގުޅޭ އެއް ޗައިނާގެ ސިޔާސަތަށް ބަދަލެއްވެސް އައިސްފައި ނުވާ ކަމަށެވެ.
