ފިލިޕީންސްގައި މިހާރު ކުރިއަށްދާ އިންޓަޕޯލް އީ – އެވިޑެންސް ފަސްޓް ރެސްޕޮންޑަރސް ޓްރެއިނިންގ ޕްރޮގްރާމުގައި ފުރަތަމަ ފަހަރަށް ދިވެހި ފުލުހަކު ކިޔަވައިދީފިއެވެ.
މި ތަމްރީނު ޕްރޮގްރާމުގައި ކިޔަވައިދެއްވީ ދެއްވީ އެންޓި ސްކޭމް ރެޕިޑް ރެސްޕޮންސްގެ އިންސްޕެކްޓަރ އޮފް ޕޮލިސް އާދަމް ނަވީދެވެ. އެގޮތުން، "ކަލެކްޓިންގ އިލެކްޓްރޯނިކް އެވިޑެންސް" އަދި "އިންޓަވިއު އެންޑް ޑޮކިއުމެންޓޭޝަން" މި ދެ މޮޑިއުލް އާދަމް ނަވީދު މި ޕްރޮގްރާމުގައި ކިޔަވައިދެއްވިއެވެ.
މި މަހުގެ 23 އިން 27 އަށް ބޭއްވޭ އިންޓަޕޯލް އީ-އެވިޑެންސް ފަސްޓް ރެސްޕޮންޑަރސް ތަމްރީނުގައި، ސައިބަރ ކްރައިމްގެ މައްސަލަތައް ބަލާ ޕްރޮސެކިއުޓަރުންނާއި ނެޝަނަލް ބިއުރޯ އޮފް އިންވެސްޓިގޭޝަނުގެ މުވައްޒަފުންގެ އިތުރުން ފިލިޕީންސްގެ ފުލުހުން ވެސް ބައިވެރިވެއެވެ.
ފިލިޕީންސްގެ ފަރާތުން ބައިވެރިވާ ފުލުހުންގެ ތެރޭގައި، އެ ޤައުމުގެ ސަރަޙައްދީ ސައިބަރ ކުށް ޔުނިޓާއި، ވިމެން އެންޑް ޗިލްޑްރެންސް ޕްރޮޓެކްޝަން ޑެސްކާއި ސައިބަރ ކްރައިމްގެ މައްސަލަތައް ތަޙުޤީޤުކުރާ ފުލުހުން ހިމެނެއެވެ.
