ދިވެހިރާއްޖެއާއެކު އޮންނަ ދެޤައުމުގެ ގުޅުން އިތުރަށް ބަދަހިކުރުމަށް މަސައްކަތް ކުރައްވާނެކަމަށް ޖަޕާނުގެ އައު ބޮޑުވަޒީރު ޝިގެރު އިޝިބާ ވިދާޅުވެއްޖެއެވެ.
ޖަޕާނުގެ އަލަށް އައްޔަންކުރެވުނު ބޮޑުވަޒީރު، ޝިގެރު އިޝިބާ، މިހެން ވިދާޅުވީ، ޓްވިޓަރގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވި މަރުޙަބާގެ މެސެޖަށް ޝުކުރު އަދާކުރައްވަމުންނެވެ.
ރައީސް މުޢިއްޒު، ކުރެއްވި ޕޯސްޓުގައި، ބޮޑުވަޒީރު އިޝިބާއަށް އިޚްލާޞްތެރި މަރުޙަބާ ދެންނެވުމާއެކު، އިޝިބާގެ ލީޑަރޝިޕާއި ޖަޕާނުގެ ދެމެހެއްޓެނިވި ކުރިއެރުމާއި ފާގަތިކަމާ މެދު އޮތް އިތުބާރު ފާޅުކުރެއްވިއެވެ. އަދި ރައީސް ވަނީ ދެ ޤައުމުގެ ދެމެދުގައި އޮތް ދިގު މުއްދަތުގެ ގުޅުން އިތުރަށް ހަރުދަނާކުރުމަށް މަސައްކަތް ކުރައްވާނެ ކަމަށްވެސް ވިދާޅުވެފައެވެ.
މި ޕޯސްޓަށް ރައްދުދެއްވަމުން ބޮޑުވަޒީރު އިޝިބާ ވަނީ ދިވެހިރާއްޖެއާއި ޖަޕާނާ ދެމެދު އޮތް ރަޙުމަތްތެރިކަމުގެ ގުޅުން ބަދަހިކުރުމަށް އޮތް އެމަނިކުފާނުގެ އަޒުމު ފާޅުކުރައްވާފައެވެ. އަދި "މިނިވަން އަދި ހުޅުވާލެވިފައިވާ އިންޑޯ-ޕެސިފިކް" ގެ ތަޞައްވުރު ކުރިއެރުވުމަށް ރައީސް މުޢިއްޒާއެކު ގާތުން މަސައްކަތްކުރުމަށް ޝައުޤުވެރިވެ ވަޑައިގަންނަވާކަމަށް ެ މަނިކުފާނު ވިދާޅުވިއެވެ.
ޖަޕާނުގެ ބޮޑުވަޒީރު ކަމުގެ މަޤާމަށް އިޝިބާ ޢައްޔަންކުރެވުނީ، އޭގެ ކުރިން އެ މަޤާމުގައި ހުންނެވި ފުމިޔޯ ކިޝިދާ ނިމިދިޔަ އޮގަސްޓު މަހު އިސްތިއުފާ ދެއްވުމާ ގުޅިގެންނެވެ. ޖަޕާނުގެ ވެރި ޕާޓީ ކަމުގައިވާ ލިބަރަލް ޑިމޮކްރެޓިކް ޕާޓީ (އެލްޑީޕީ) ގެ ލީޑަރޝިޕަށް އައު ބޭފުޅަކު ހޮވުމަށް އިންތިޚާބެއް ބޭއްވުނީ، ކިޝިދާ އިތުރު ދައުރަކަށް ވާދަނުކުރައްވަން ނިންމެވުމާ ގުޅިގެންނެވެ. މި އިންތިޚާބުގައި ނުވަ ކެންޑިޑޭޓުންނާ ވާދަކުރެއްވިއިރު، ކާމިޔާބު ހީދެއްވީ އިޝިބާއެވެ.
