ނެޝަނަލް ކެރިޔަރ ސަރވިސް (އެންސީއެސް) އާއި ސަސްޓެއިނަބަލް އެންޑް އިންޓެގްރޭޓެޑް ލޭބަރ ސަރވިސެސް (ސެއިލްސް) ޕްރޮޖެކްޓުން އިސްނަގައިގެން ލ. ފޮނަދޫގައި ޒުވާނުންނަށް ވަޒީފާ ހޯދައިދިނުމާ ގުޅޭގޮތުން މަޝްވަރާ ބައްދަލުވުމެއް ބާއްވައިފިއެވެ.
މި ބައްދަލުވުމުގައި ލ. ފޮނަދޫ ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިތުރުން، އަމިއްލަ ޖަމާޢަތްތަކާއި ވަޒީފާދޭ ފަރާތްތައް ބައިވެރިވިއެވެ. ބައްދަލުވުމުގައި މައިގަނޑު ގޮތެއްގައި މަޝްވަރާކުރެވުނީ ރަށުގެ ޒުވާނުންނާއި ވަޒީފާ ބޭނުންވާ ފަރާތްތަކަށް ވަޒީފާ ހޯދުމުގައި ކުރިޔަށްދާނެ ގޮތްތަކާ ބެހޭގޮތުންނެވެ.
އެންސީއެސްގެ ފަރާތުން މި ބައްދަލުވުމުގައި އެ އިދާރާއިން ފޯރުކޮށްދޭ ޚިދުމަތްތަކާ ބެހޭ މަޢުލޫމާތު ހިއްސާކުރިއެވެ. އަދި ސެއިލްސް ޕްރޮޖެކްޓުގެ ފަރާތުން ކުރިޔަށް ގެންދިއުމަށް ރާވާފައިވާ ތަމްރީނު ޕްރޮގްރާމްތަކާއި ހުނަރު ބިނާކުރުމަށް ހުރި ފުރުސަތުތަކާ ބެހޭގޮތުން މަޢުލޫމާތު ދިނެވެ.
މަތީ ތަޢުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާ ބެހޭ ވުޒާރާގެ ފަރާތުން މަޢުލޫމާތު ދެއްވި ގޮތުގައި، އެންސީއެސް އަދި ސެއިލްސް ޕްރޮޖެކްޓްގެ ދަށުން ލ. ފޮނަދޫގައި ކުރިއަށް ގެންދާ އައުޓްރީޗް ޕްރޮގްރާމަކީ ވަޒީފާދޭ ފަރާތްތަކާއި ވަޒީފާ ހޯދުމަށް މަސައްކަތްކުރާ ޒުވާނުން އެންސީއެސްގެ ޚިދުމަތްތަކާއި އެންސީއެސް ޕޯޓަލްއަށް އަހުލުވެރިކުރުވުމަށް އަމާޒުކޮށް ކުރިއަށް ގެންދާ ޕްރޮގްރާމެކެވެ.
