ގއ. ގެމަނަފުށީ ކައުންސިލުން ރަށުގައި ގާޑިޔާ ބެހެއްޓުމަށް 7 ސަރަހައްދެއް ކަނޑައަޅައިފިއެވެ.
މި މަޢުލޫމާތު ހާމަކޮށްފައިވަނީ ގެމަނަފުށީ ކައުންސިލްގެ އިދާރާއިންނެވެ.
ކައުންސިލުން ކަނޑައަޅާފައިވާ ސަރަހައްދުތަކުގެ ތެރޭގައި ހިމެނެނީ ޔެލޯޑައިމަންޑް ގޯތީގެ ދެކުނުން ޒުވާނުންގެ މަރުކަޒު ޢިމާރާތްކުރާ ގޯތީގެ އުތުރުން އޮންނަ ހުރަސް މަގުގެ ފާރުކައިރިކައިރި އާއި، ނަރުދަމާ އޮފީހުގެ ދެކުނުން ފުނަގަސް ކައިރި އެވެ. މީގެ އިތުރުން ރަށުގެ ދެކުނު ހުރަސް ޖެޓީގެ މަގަށް ޖާގަ ދޫކޮށް ދެކުނުގައި އާއި، ގެމަނަފުށީ ޕޮލިސް ސްޓޭޝަން އެޅުމަށް ދޫކޮށްފައިވާ ގޯތީގެ އުތުރުން އޮންނަ ޕާކުގައި ވެސް ގާޑިޔާ ބެހެއްޓުމަށް ހަމަޖެހިފައިވެއެވެ.
އަދި މާރެހާވިއުގެ އިރުމަތީ ފަޅިން ފެންވަރާ ހަޓުގެ އިރުމަތިން ނުވަތަ އުނދޯލީގޭގެ ހުޅަނގުން ރުއްތަކުގެ ތެރޭގައި ވެސް ގާޑިޔާ ބެހެއްޓުމަށް ހަމަޖެހިފައިވާއިރު، ސަންރައިޒް ސަރަހައްދު އާއި ޕެރަޑައިސް ސަރަހައްދުގައި ވެސް ގާޑިޔާ ބެހެއްޓުމަށް ކަނޑައަޅާފައިވެއެވެ.
މި ނިންމުމަކީ ރަށުގެ އާންމު ސާފުތާހިރުކަން ދެމެހެއްޓުމަށާއި، ކުނި އުކާލުމުގެ ނިޒާމު ހަރުދަނާކުރުމަށް އެޅޭ މުހިންމު ފިޔަވަޅެއް ކަމަށް ބެލެވެއެވެ. މި ސަރަހައްދުތަކުގައި ގާދިޔާ ބެހެއްޓުމުން ރަށުގެ ރައްޔިތުންނަށް ފަސޭހައިން ކުނި އުކާލުމުގެ އިންތިޒާމު ހަމަޖެހިގެންދާނެ ކަމަށް އުންމީދު ކުރެވެއެވެ.
