މޫނުބުރުގާ އަޅައިގެން އުނގެނުމާއި ވަޒީފާ އަދާކުރުމުގެ ޙައްޤު ލިބޭނެކަމަށް ރައީސް މުޙައްމަދު މުޢިއްޒު ދެއްވި ޔަޤީންކަމަށް ރިޢާޔަތްކޮށް، ސިވިލް ކޯޓުން މިއަދު މުހިންމު ނިންމުމެއް ނިންމައިފިއެވެ.
ސިވިލް ކޯޓުގެ އިސް ޤާޟީ މަރިޔަމް ވަޙީދު މިއަދު ކުރެއްވި ޙުކުމުގައި، އެމްޑީޕީ ސަރުކާރުގައި ޢަރަބިއްޔާގައި ތަޢުލީމު ޙާޞިލްކުރަމުންދިޔަ ދަރިވަރުންތަކެއް މޫނު ބުރުގާ އަޅައިގެން ކިޔަވަން ދިއުން މަނާކޮށް، ތަޢުލީމު ޙާޞިލުކުރުމުގެ ފުރުޞަތު ގެއްލުވާލި މައްސަލައިގައި އިތުރަށް ކުރިއަށް ދާނެ ސަބަބެއް ނެތްކަމަށް ކަނޑައަޅުއްވާފައިވެއެވެ.
މި މައްސަލައިގައި އެޑިޔުކޭޝަން މިނިސްޓްރީއާއި ދިވެހި ދައުލަތާ ދެކޮޅަށް ދަރިވަރުންގެ ބެލެނިވެރީން ދަޢުވާ އުފުލާފައިވާއިރު، ރައީސް މުޢިއްޒުގެ ސަރުކާރުގެ ސިޔާސަތަކީ މޫނު ބުރުގާ އަޅައިގެންވެސް ވަޒީފާ އަދާކުރުމާއި އުނގެނުމުގެ ހަމަހަމަ އިންސާފުވެރި ޙައްޤު ކޮންމެ ރައްޔިތަކަށްވެސް ދިނުންކަމަށް ބެލެނިވެރީން ކޯޓުގައި ފާހަގަކޮށްފައިވެއެވެ.
ރައީސް މުޢިއްޒު 22 އޮގަސްޓް 2023 ގައި އެކްސްގައި ޕޯސްޓްކުރައްވާފައިވާ ގޮތުން، މޫނު ބުރުގާ އަޅައިގެން ވަޒީފާ އަދާކުރުމުގެ ޙައްޤު ޙިމާޔަތްކޮށްދެއްވާނެކަމުގެ ކަށަވަރުކަން ދެއްވާފައިވެއެވެ.
މި ނިންމުމާ ގުޅިގެން، އެމްޑީޕީ ސަރުކާރުގައި އުނގެނުމުގެ ޙައްޤުން މަޙުރޫމުކުރެވުނު ދަރިވަރުންނަށް މިހާރުގެ ސަރުކާރުގައި އެ ޙައްޤު ލިބޭނެކަމުގެ ޔަޤީންކަން އޮތްކަމަށް ކޯޓުން ނިންމާފައިވެއެވެ.
މި ޤަޟިއްޔާއަކީ ސިވިލް ކޯޓުގެ ނަންބަރު 1231-CVC-2023 ޤަޟިއްޔާއެވެ. މި މައްސަލައިގެ އިތުރު މަޢުލޫމާތު ސިވިލް ކޯޓުންނާއި އެ ކޯޓުގެ ރަސްމީ ވެބްސައިޓުން ލިބެން ހުންނާނެއެވެ.
