އައިޖީއެމް ހަސްފަތާލު ކައިރީގައި ހަދާފައިވާ ޑްރެއިން ސިސްޓަމް މިހާރު ކާމިޔާބު ކަމާއެކު މަސައްކަތް ކުރާކަން އިއްޔެ ވެހުނު ބޯވާރޭން ފެނިގެން ހިނގައްޖެއެވެ. އެކަމާ ގުޅިގެން އެކްސްގައި ކުރެއްވި ޕޯސްޓެއްގައި ކޮންސްޓްރަކްޝަން އެންޑް އިންފްރާސްޓްރަކްޗަރ މިނިސްޓަރ ޑރ. ޢަބްދުﷲ މުއްޠަލިބު ވިދާޅުވީ، އެނިޒާމަކީ، "މާލޭގެ ހުޅަނގު ސަރަޙައްދުގައި، ވަކިން ޚާއްޞަކޮށް ވެސްޓް ޕާކާއި، އައި.ޖީ.އެމް. ހޮސްޕިޓަލް ހިމެނޭ ސަރަޙައްދުގައި ފެން ބޮޑުވެ ޢާންމު ދިރިއުޅުމަށް ދަތިވެ، ބައެއް ގެތަކަށް ގެއްލުން ލިބޭތީ ... އެކަން ޙައްލު ކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންގެވުމާ ގުޅިގެން" ކުރިއަށް ގެންގޮސްފައިވާ މަސައްކަތެއް ކަމަށެވެ. އަދި އެ މަސައްކަތަކީ، މިނިސްޓްރީ އޮފް ޑިފެންސްގެ އިސްނެގުމަކަށް، މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ ބައިވެރިވުމާއެކު އާރު.ޑީ.ސީ އާ ޙަވާލުކުރެވިގެން ކުރިއަށް ގެންދެވުނު މަސައްކަތެއް ކަމަށެވެ.
މި މަސައްކަތް ފެށިފައި ވަނީ، 10 މެއި 2024 ގައެވެ.
މިނިސްޓަރ ޢަބްދުﷲ މުޢްޠަލިބު ވިދާޅުވިގޮތުގައި މި މަސައްކަތުގައި އަދި ނިމިފައި ވަނީ އޭގެ ބައެކެވެ.
"މި ކުރެވޭ މަސައްކަތުން ފެންބޮޑުވާ މައްސަލައަށް އެއްކޮށް ޙައްލު ނުލިބުނު ނަމަވެސް މާލޭގެ މަގުތައް ރަނގަޅު ފެންވަރަކަށް ހެދެންދެން ރައްޔިތުންނަށް ފޯރާ ދަތިތައް ކުޑަކުރެވި ޕަންޕު ބޭނުންކޮށްގެން ފެން ހިންދުމަށް ފަސޭހަވެގެންދާނެ" މިނިސްޓަރ މުއްޠަލިބުގެ ޕޯސްޓުގައި ވިދާޅުވިއެވެ.
އޭގެ އިތުރުން، މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރއިން، މާލޭގެ އެކި ސަރަޙައްދުތަކުގައި ބެހެއްޓިފައިވާ ސްޓޯމްވޯޓަރ މެނޭޖްމަންޓް ސިސްޓަމް މެއިންޓެއިންކޮށް ބަލަހައްޓާނެ ކަމުގައިވެސް މިނިސްޓަރ ވިދާޅުވިއެވެ.
