އިދިކޮޅު އެމްޑީޕީގެ މޭޔަރު އިސްވެ ހުންނަވާ މާލޭ ސިޓީ ކައުންސިލުގެ މަސައްކަތަށް ސަރުކާރުން އެއްބާރުލުން ދޭކަމަށް މާލޭ ސިޓީ ކައުންސިލްގެ މޭޔަރު އާދަމް ޢާޒިމް ވިދާޅުވި ވާހަކަތައް ސެންސަރު ކުރުމަށް އަންގައިފިއެވެ.
"ދަތިވާ އެއްވެސް ކަމެއް ނެތް. ބުނާ ހުރިހައި ކަމެއް ކޮށްދޭ" ސަރުކާރާއި ސިޓީ ކައުންސިލާ ދެމެދުގެ އޮމާން ގުޅުމަށް އިޝާރާތް ކުރައްވަމުން ޢާޒިމް ވިދާޅުވިއެވެ. ޢާޒިމް ވިދާޅުވީ މުވައްޒަފުން ނެގުމުގައިވެސް އޭނާއަށް ހުރަހެއް ނެތް ކަމަށެވެ. އަދި އޭނާ ބޭނުންވާ މިންވަރަށް ބޭނުންވާ ބަޔަކު ކޮންސަލްޓެންޓުންގެ ގޮތުގައި ނަގާފައިވާ ކަމަށް އިޝާރާތް ކުރައްވަމުން ވިދާޅުވީ، 15 ކޮންސަލްޓެންޓުން ނަގަން ބޭނުންވީމަ އެކަން ވެސް ހަމަޖެހިގެން ގޮސްފައިވާ ކަމަށެވެ. އަދި ނަގާފައިވަނީވެސް މޭޔަރު ނިސްބަތްވާ އެމްޑީޕީގެ މީހުން ކަމުގައިވެސް ވިދާޅުވިއެވެ.
އެމްޑީޕީގެ ޗެއަރޕާސަން ފައްޔާޒު އިސްމާޢީލު ވަނީ އެމްޑީޕީއަށް ނިސްބަތްވާ ކޮންސަލްޓެންޓުން ނެގިކަމަށް މޭޔަރު ވިދާޅުވި ވާހަކަ ޓުއީޓު ކުރާއިރު ސެންސަރު ކުރުމަށްވެސް އޭނާގެ ސޯޝަލް މީޑިއާ ޓީމަށް އަންގަވާފައެވެ.
މޭޔަރު ވަނީ އޭނާގެ ވެރިކަމުގައި ކުރެވުނު ނުވަތަ ކުރެވެމުން ދާ ކަންކަންވެސް ލިސްޓުކޮށްދެއްވާފައެވެ. އެގޮތުން އޭނާ އަލި އަޅުވައިލެއްވީ 3 ކަމުގެ ތެރޭން އައު ސަހަރާގެ މަސައްކަތް ނިންމާލުމާއި، ނޮވެމްބަރު މަހު ހުޅުވާ ބުޅަލުގެ ހިޔާވެއްސާއި މާލޭގެ ފެންހިންދުމުގެ މައްސަލަ ލިސްޓުކޮށްދެއްވިއެވެ.
މާލޭ ސިޓީގެ މޭޔަރ އާދަމް އާޒިމް ވާހަކަ ދައްކަވމުން ގެންދެވީ، ކުޅުދުއްފުށި ސިޓީގައި އެމްޑީޕީން ކުރިއަށް ގެންދާ ލާމަރުކަޒީ ގުޅުން ކޮންފަރެންސްގައެވެ.
މޭޔަރު ވަނީ ނަތީޖާ ޙާސިލުކުރުމުގައި އެނާ ގެންގުޅުއްވާ ފަލްސަފާވެސް އެމްޑީޕީގެ މެމްބަރުންނަށް ވިދާޅުވެ ދެއްވާފައެވެ. ނަތީޖާ ޙާޞިލުކޮށް ދެއްކޭނީ، ރަޙުމަތްތެރި ކަމުގެ މާޙައުލެއްގައި އެންމެންނާ ގުޅިގެން މަސައްކަތް ކުރުމުން ކަމުގައި ވިދާޅުވިއެވެ.
މޭޔަރު ވިދާޅުވީ މަސައްކަތުގައި ގޮންޖެހުންތަކެއް ހުންނާނެ ކަމަށްވެސް ބަލަންވާނެ ކަމަށެވެ. ނަމަވެސް ރައްޔިތުންނަށް ފަހިވާ ގޮތަށް ކަންކަން ކުރިއަށް ގެންދިއުމަށްޓަކައި، މައްސަލަތައް ސިޔާސަ ކުރެއްވުމަކީ މޭޔަރުގެ ސިޔާސަތެއް ނޫންކަން އޭނާގެ ވާހަކަފުޅުތަކުން ހާމަވިއެވެ.
"އަޅުގަނޑު ކަން ކުރާ ގޮތަކީ ރައްޔިތުންނާ ގުޅުން ހުރިކަންކަން ނޫނީ (މަޝްވަރާއަށް) ނުގެންދަނީ." އާޒިމް ވިދާޅުވިއެވެ. އަދި ސިޓީ ކައުންސިލްގެ އެހެން މެމްބަރުންވެސް ނަތީޖާ ހާސިލުކޮށް ދައްކަން ބޭނުންވާ ކަމަށް ވިދާޅުވެ ކައުންސިލަރުންނަށްވެސް މޭޔަރ ހެޔޮބަސްފުޅެއް ވިދާޅުވިއެވެ.
