ގިނަ ބަޔަކު އިންތިޒާރުކުރަމުން އައި ފިލްމް، ޖޯކަރ ގެ ސީކުއަލް، ޖޯކަރ: ފޮލީ އާ ޑޫ، އެމެރިކާގެ ބޮކްސް އޮފީހުގައި ހުޅުވިފައިވަނީ 37.8 މިލިއަން ޑޮލަރުގެ އާމްދަނީއަކާއެކުގައިއެވެ.
އެކަމަކު މިއީ އަންދާޒާކުރެވުނު ވަރަށްވުރެ މާ ދަށް އަދަދެކެވެ.
ޖޮއަކުއިން ފީނިކްސް އަދި ލޭޑީ ގާގާ ސްޓާކޮށްގެން ހެދި މި ފިލްމުގެ ހުޅުވިފައި ވަނީ އޮރިޖިނަލް ޖޯކަރ (2019) އާ އަޅާބަލާއިރު ވަރަށް ދެރަކޮށެވެ. ފުރަތަމަ ޖޯކަރ ފިލްމު ހުޅުވުނު ހަފްތާގައި 96.2 މިލިއަން ޑޮލަރު ހޯދާފައިވެއެވެ.
ފޮލީ އާ ޑޫ އަށް ފުރަތަމަ ހޯދޭނެކަމަށް ލަފާކުރެވުނީ 50 މިލިއަން އާއި 70 މިލިއަން ޑޮލަރު ދެމެދުގެ އަދަދެކެވެ. ނަމަވެސް ފިލްމަށް އެވަރުގެ ތަރުހީބެއް ނުލިބުނެވެ. ނުރަނގަޅު ރިވިއުތަކާއި ދެރަ ވާހަކަތަކުގެ ސަބަބުން ފިލްމުގެ ޕަރފޯމަންސް ދަށްވިއެވެ. މިގޮތުން ފިލްމަަށް ސިނެމާސްކޯގައި ލިބުނީ "ޑީ" ގްރޭޑެކެވެ. އަދި ރޮޓަން ޓޮމޭޓޯސްގައި ކްރިޓިކުންނާއި އާންމުންގެ ރޭޓިންގ ވަނީ އެވްރެޖްކޮށް 37 އިންސައިތައިގައެވެ.
އެމެރިކާއިން ބޭރުގައި ފިލްމުގެ ކާމިޔާބީ ކުޑަކޮށް ރަނގަޅުވެ، 81 މިލިއަން ޑޮލަރު ހޯދިއެވެ. މުޅި ދުނިޔޭގައި ޖޯކަރ 2 އަށް މިހާތަނަށް ލިބިފައިވަނީ 121 މިލިއަން ޑޮލަރެވެ. މި ފިލްމުގެ ލަފާކުރެވޭ ބަޖެޓަކީ 200 މިލިއަން ޑޮލަރެވެ.
އޮރިޖިނަލް ޖޯކަރ އަކީ ބޮކްސް އޮފީހުގައި ވަރަށް ކާމިޔާބު ފިލްމެކެވެ. އެ ފިލްމު މުޅި ދުނިޔޭގައި 1 ބިލިއަން ޑޮލަރަށްވުރެ ގިނަ އަދަދައްގެ އާމްދަނީއެއް ހޯދިއެވެ. ނަމަވެސް ފޮލީ އާ ޑޫ ވަނީ ދަތިތަކާ ކުރިމަތިލާންޖެހިފައެވެ. ކްރިޓިކުން ބުނާގޮތުގައި ފިލްމުގައި ހިމެނޭ މިއުޒިކަލް އެލަމެންޓްތަކަކީ ފަހަރެއްގައި ގޯސްކޮށް އެޅުނު ފިޔަވަޅެއް ކަމުގައި ވެދާނެއެވެ.
