ރައްޔިތުންގެ މަޖިލީހުގެ ރައީސް އަލްފާޟިލް އަބްދުއްރަހީމް އަބްދުﷲ، ރޭ ޖެނީވާއަށް ފުރާވަޑައިގެންފިއެވެ.
ރައްޔިތުންގެ މަޖިލީހުގެ އިދާރާއިން މަޢުލޫމާތު ދެއްވާފައިވާ ގޮތުގައި، މި ދަތުރުފުޅަކީ އިންޓަ-ޕާލިމެންޓަރީ ޔޫނިއަން (އައިޕީޔޫ) ގެ 149 ވަނަ އެސެމްބްލީގައި ބައިވެރިވެ ވަޑައިގަތުމަށް ކުރައްވާ ރަސްމީ ދަތުރުފުޅެކެވެ. މި އެސެމްބްލީ ކުރިއަށްދާނީ މިއަދުން ފެށިގެން މި މަހުގެ 17 ވަނަ ދުވަހުގެ ނިޔަލަށެވެ.
މި ފަހަރުގެ އައިޕީޔޫ އެސެމްބްލީގެ މައުޟޫޢަކީ "ސުލްޙަވެރި އަދި ދެމެހެއްޓެނިވި މުސްތަޤުބަލަކަށްޓަކައި ސައިންސް، ޓެކްނޮލޮޖީ އަދި އިނޮވޭޝަން (އެސްޓީއައި) ގެ ބޭނުން ހިފުން" އެެވެ. އަދި ގާނޫނު ހަދާ މަޖިލިސްތަކުގެ ބޭފުޅުންގެ މެދުގައި އެ ދާއިރާއިން މަޝްވަރާކޮށް، ދައުރު ފުޅާކުރުމާ ގުޅޭގޮތުން ވާހަކަދައްކަވަން ވަނީ ހަމަޖެހިފައެވެ.
މަޖިލީހުގެ ރައީސްގެ މި ދަތުރުފުޅުގައި، ވިލިމާލެ ދާއިރާގެ މެންބަރު އަލްފާޟިލް މުޙައްމަދު އިސްމާޢީލް، ފުވައްމުލަކު މެދު ދާއިރާގެ މެންބަރު އަލްފާޟިލް ޢަލީ ފަޒާދު، ހުޅުދޫ ދާއިރާގެ މެންބަރު އަލްފާޟިލް މުޙައްމަދު ޝާހިދު އަދި ކަނޑިތީމު ދާއިރާގެ މެންބަރު އަލްފާޟިލް އަމީން ފައިޞަލް ބައިވެރިވެ ވަޑައިގަންނަވައެވެ.
